බෙදුම්වාදී යුද්ධයේ දී සටන් පෙරමුණේ සිටි රණවිරුවන් විසින් යුද අපරාධ සිදු කරන ලදැයි චෝදනා කර එම විරුවන්ට සහ දේශපාලන නායකත්වයට එරෙහි ව යුද අපරාධ සාක්ෂි එකතු කිරීම සඳහා බාහිර යාන්ත්‍රණයක් ක්‍රියාත්මක වන බව ජාතික ආරක්ෂාව පිළිබඳ ආංශික අධීක්ෂණ කාරක සභා සභාපති සරත් වීරසේකර පවසනවා.
සභාපතිවරයා මේ බව පෙන්වා දුන්නේ පාර්ලිමේන්තුවේ ජාතික ආරක්ෂාව පිළිබඳ ආංශික අධීක්ෂණ කාරක සභාව පසුගියදා (05) රැස් වූ අවස්ථාවේ දී යි.
මෙරට පැවති බෙදුම්වාදී යුද්ධයේ දී සටන් පෙරමුණේ සිටි රණවිරුවන් විසින් යුද අපරාධ සිදු කරන ලදැයි චෝදනා කර එම විරුවන්ට සහ දේශපාලන නායකත්වයට එරෙහි ව යුද අපරාධ සම්බන්ධ ව සාක්ෂි එකතු කිරීම සඳහා බාහිර යාන්ත්‍රණයක් අවුරුදු 2ක සිට ස්විට්සර්ලන්තයේ ජිනීවා හි 46/1 යෝජනාව අනුව පිහිටුවා ඇති බවයි වීරසේකර මහතා පෙන්වා දුන්නේ.
එම යාන්ත්‍රණය විසින් මෑතක දී ප්‍රකාශයට පත් කරන ලද වාර්තාවක දක්වා ඇත්තේ මෙරට හමුදා නායකයන්ට එරෙහි ව සැලකිය යුතු සාක්ෂි ප්‍රමාණයක් ඔවුන් සතු ව ඇති බවයි.
මෙලෙස යුද අපරාධ සිදු කරන ලදැයි සාක්ෂි ලැබී ඇති මෙරට හමුදා නායකයන්ට එරෙහි ව සර්ව ලෝක අධිකරණ බලය යටතේ අදාළ රටවල සහ ජාත්‍යන්තර අධිකරණයේ නඩු පැවරීම සඳහා දැනට රටවල් කිහිපයක් ඒකාබද්ධ ව කටයුතු කරමින් පවතින බවත් ඊට අවශ්‍ය කටයුතු මෙරට විදේශ කටයුතු අමාත්‍යාංශය විසින් මේ වනවිටත් ක්‍රියාත්මක කරමින් පවතින බව ද සභාපතිවරයා අවධාරණය කළා.
