රේගු පරීක්‍ෂණ කටයුතු සඳහා ‘ග්‍රේ ලයින් 2’ භාණ්ඩ පරීක්‍ෂණ අංගයේ නවතා තිබූ නීති විරෝධීව ආනයනය කළ සුවඳ විලවුන් සහ ආලේපන අඩංගු බහලුමක් ව්‍යාජ ලේඛන සකස් කර රේගුවෙන් නිදහස් කිරීමේ චෝදනා එල්ල වී සිටින ජ්‍යෙෂ්ඨ රේගු අධ්‍යක්‍ෂවරයකු ඇතුළු ඉහළ නිලධාරීන් සිව් දෙනෙකුගේ වැඩ තහනම් කර තිබෙනවා.
මෙලෙස වැඩ තහනමට ලක්ව ඇති නිලධාරින් අතර රේගු දෙපාර්තමේන්තුවේ නියෝජ්‍ය රේගු
අධ්‍යක්‍ෂවරියක්, නියෝජ්‍ය රේගු අධ්‍යක්‍ෂවරයකු සහ රේගු අධිකාරිවරයකු සිටිනවා.
මෙම බහලුමේ තිබූ මෙරට ලියාපදිංචි නොකළ සුවඳ විලවුන් සහ ආලෝපන වටිනාකම රුපියල් කෝටියකට අධික වියහැකි බව රේගු දෙපාර්තමේන්තුවේ උසස් නිලධාරියෙකු සදහන් කළා.
මෙම නීති විරෝධි සුවඳ විලවුන් සහ ආලේපන අඩංගු බහලුම අදාළ විමර්ශන ගොනුවේ ලියකියවිලි වෙනස් කර ව්‍යාජ නව ලියකියවිලි යොදා පසුගිය 12 වැනිදා ‘ග්‍රේ ලයින් 2’ අංගනයෙන් නිදහස් කර අතර එම බහලුම හෝ එහි තිබූ සුවඳ විලවුන් සහ ආලෝපන සොයා ගැනීමට මෙතෙක් හැකි වී නැහැ.
එම බහලුමේ නීති විරෝධී සුවඳ විලවුන් සහ ආලේපන අඩංගු බවට හඳුනා ගැනීමෙන් අනතුරුව පසුගිය ජනවාරි මාසයේ දී රේගු භාරයට ගෙන ආනයනකරුට දඩ මුදල් පැනවීමට ද කටයුතු කර තිබුණා.
කෙසේ වෙතත් මේ වන තෙක් අදාළ දඩ මුදල් ද ගෙවා නොමැති බව මේ වන විට ආනවරණ වී තිබෙනවා.
රේගු මධ්‍යම මිල පිරික්සුම් අංශයේ තිබූ එම බහලුමට අදාළ ලිපි ගොනුවේ සත්‍ය ලේඛන පරීක්‍ෂා කිරීමේ දී ව්‍යාජ ලේඛන හඳුනා ගැනීමට හැකි වී ඇති අතර සිද්ධිය සම්බන්ධයෙන් රේගු දෙපාර්තමේන්තුව වැඩිදුර විමර්ශනයක් ආරම්භ කර තිබෙනවා.
