රුසියාවේ උසස් අධ්‍යාපනය ලබාදෙන බව පවසා සංචාරක වීසා යටතේ එරටට ශ්‍රී ලංකාවේ සිසුන් රැගෙන ගොස්, ඔවුන්ගේ මුදල් වංචානික ව ලබාගත් පුද්ගලයෙකු මීගමුව විශේෂ අපරාධ විමර්ශන අංශයේ නිලධාරීන් පිරිසක් විසින් අත්අඩංගුවට ගෙන තිබෙනවා.
ඊයේ (20) රාත්‍රියේ දී මෙම සැකකරු අත් අඩංගුවට ගෙන ඇති බවයි වාර්තා වන්නේ.
32 හැවිරිදි සැකකරු වත්තල හුණුපිටිය ප්‍රදේශයේ පදිංචිකරුවෙක්.
මොහු කටාන ප්‍රදේශයේ සිසුවෙකු ව රුසියාවේ උසස් අධ්‍යාපනය සදහා යවන බව පවසා රුපියල් විසි එක් ලක්ෂ අනූ පන් දහසක මුදලක් වංචා කිරීම පිළිබඳ මීගමුව විශේෂ අපරාධ විමර්ශන අංශය වෙත සිදු කර තිබූ පැමිණිල්ලකට අදාළ ව මීගමුව මහේස්ත්‍රාත් අධිකරණය මගින් ලබාගෙන තිබූ ගුවන් ගමන් තහනමක් උපයෝගී කර ගනිමින් මොහු රුසියාවේ සිට මෙරටට පැමිණෙමින් සිටියදී‍යි කටුනායක ගුවන් තොටුපොළේ දී අත්අඩංගුවට ගෙන ඇත්තේ.
මීගමුව විශේෂ අපරාධ විමර්ශන අංශය වෙත ලැබී තිබූ පැමිණිල්ලට අමතර ව මොහුට එරෙහි ව මාතර මූලස්ථානය පොලිසිය වෙත ලැබී තිබූ පැමිණිලි 17ක් , කුලියාපිටිය පොලිසියට ලැබුණු පැමිණිලි 02 ක් ද , කුරුණෑගල පොලිසියට පැමිණිලි 03 ක් ද ,නාරාහේන්පිට පොලිසියට ලැබී තිබූ එක් පැමිණිල්ල ක් ද මතයි දීර්ඝ විමර්ශනයක් සිදු කර සැකකරුව අත්අඩංගුවට ගෙන ඇත්තේ.
මෙම පුද්ගලයා මෙසේ රුසියාවට රැගෙන ගිය සිසුවෙකුට පිහියකින් ඇන තුවාල සිදු කිරීම පිළිබඳ එරට පොලිසිය ද මොහුට එරෙහිව විමර්ශන ආරම්භ කිරීමත් සමග, එයින් බේරීම සඳහා අදාළ සැකකරු ඊයේ මෙරටට පලා ඒමේදි අත් අඩංගුවට පත් ව තිබෙනවා.
සිද්ධිය සම්බන්ධයෙන් වැඩිදුර විමර්ශන මීගමුව විශේෂ අපරාධ විමර්ශන විසින් ක්‍රියාත්මක කරනු ලබනවා.
