අනුරාධපුර – පාදෙණිය ප්රධාන මාර්ගයේ තඹුත්තේගම පොලිස් වසමේ මල්වානේගම, රාජපක්ෂගම ප්රදේශයේදී තඹුත්තේගම සිට අනුරාධපුර දක්වා ධාවනය වෙමින් තිබූ පෞද්ගලික බස් රථයක් සහ පසු පසින් පැමිණි ලොරි රථයක් ගැටීමෙන් සිදුවූ අනතුරෙන් ලොරි රථයේ ඉදිරිපස අසුනේ සිටි ලොරි සහයකවරයා ජීවිතක්ෂයට පත්ව තිබෙනවා.
මෙම අනතුර අද (11) අළුයම 5.00ට පමණ සිදුව තිබෙන අතර ලොරි රථය පැදවූ රියදුරුට නින්දයෑම හේතුවෙන් රථයේ වේගය පාලනය කර ගැනීමට නොහැකිව ඉදිරියෙන් ගමන් කළ බස් රථයේ ගැටී අනතුර සිදුව ඇති බව මූලික පරීක්ෂණයේ දී අනාරණය වූ බව තඹුත්තේගම පොලිසිය පවසනවා.
අනතුරින් ලොරි රථයේ ඉදිරිපසට මෙන්ම බස් රථයේ පිටුපසට දැඩි අලාභ හානි සිදුව තිබූනද පසුපස අසුන් පෙළේ කිසිවකුත් සිට නොතිබීම නිසා මගීන්ට කිසිදු හානියක් සිදුව නොමැති බවයි වාර්තා වන්නේ.
අනතුර සිදුවීමෙන් පසු ප්රදේශවාසීන් එක්ව ලොරි රථයේ සිරවී සිටි පුද්ගලයා දැඩි වෙහෙසක් දරා මුදවාගෙන තඹුත්තේගම රෝහලට ඇතුළත් කළද ඔහු මියගොස් ඇති බවයි පොලිසිය සඳහන් කළේ.
අනතුරට පත් ලොරි රථය කෙරවල පිටිය ප්රදේශයේ සිට අනුරාධපුරයේ පෞද්ගලික වෙළෙඳ සැලකට එලවළු ප්රවාහනය කරමින් සිටියදී මෙම අනතුර සිදුව තිබෙන අතර,මියගිය පුද්ගලයා කඩවත ප්රදේශයේ පදිංචිකරුවෙක් බවයි වාර්තා වන්නේ.
අනතුර සම්බන්ධයෙන් මේ වනවිට ලොරි රථයේ රියදුරු පොලිස් අත්අඩංගුවට ගෙන ඇති අතර සිද්ධිය පිළිබඳ වැඩිදුර විමර්ශන තඹුත්තේගම පොලිසිය මගින් සිදු කරනු ලබනවා.
