රුසියා-යුක්රේන යුද වාතාවරණය හමුවේ ආසියානු වෙළෙඳපොළේ රන් මිල ඉහළගොස් තිබේ.
ඒ අනුව ආසියානු වෙළෙඳපොළේ රන් අවුන්සයක මිල අමෙරිකානු ඩොලර් 2000 ඉක්මවා ගොස් ඇති බව වාර්තා විය.
එය ඩොලර් 2000.86ක් ලෙස දැක්විණි.
රුසියා-යුක්රේන යුද වාතාවරණය නිසා සුරක්ෂිතතාවය හේතුවෙන් ආසියානු වෙළෙඳපොළේ රන් මිල මෙලෙස ඉහළගොස් ඇති බව ආර්ථික විශේෂඥයෝ පවසති.
මේ අතර ලෝක වෙළෙඳපොළේ අත්පිට රන් ගැණුම් මිල ද ඩොලර් 2000.69 දක්වා ඉහළගොස් ඇති බව විදෙස් මාධ්ය වාර්තා කරනු ලැබීය.
කෙසේ වෙතත් පසුව එම වාර්තා සඳහන් කරන්නේ එම මිල ඩොලර් 1998.38 දක්වා පහත බැස ඇති බවය.
මෙම තත්ත්වය හේතුවෙන් මෙරට වෙළඳපොළේ රන් මිලද ඉහළගොස් තිබේ.
කොළඹ හෙට්ටිවිදිය රන් ආභරණ නිෂ්පාදකයන්ගේ මිල ගණන්වලට අනුව කැරට් 22 රන් පවුමක මිල මේ වනවිට සටහන් ව ඇත්තේ රුපියල් 122,100ක් ලෙසය.
එසේම කැරට් 24 රන් පවුමක මිල 132,000ක් ලෙස දැක්වෙයි.
මෙම වසර ආරම්භයේදී කොළඹ හෙට්ටිවිදිය රන් ආභරණ නිෂ්පාදකයන්ගේ මිල ගණන්වලට අනුව කැරට් 22 රන් පවුමක් 112,900ක් ලෙස වාර්තා වූ අතර කැරට් 24 රන් පවුමක මිල වසර ආරම්භයේදී සටහන් වූයේ රුපියල් 122,000ක් ලෙසටය.
