රාජ්ය ඖෂධ සංස්ථාව සහ ඉන්දීය සමාගමක් එක්ව අත්සන් කිරීමට සැරසෙන අවබෝධතා ගිවිසුම පිළිබඳ ව වහාම රටට හෙළි කරන ලෙස වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානයේ සභාපති විශේෂඥ වෛද්ය චමල් සංජීව පවසනවා.
සභාපතිවරයා පවසන්නේ අදාළ ගිවිසුම්ගත වීමට සැරසෙන ඉන්දීය සමාගම උපත් පාලන කොපු නිෂ්පාදනය කරන සමාගමක් බවටයි.
අත්යවශ්ය ඖෂධ මිල දී ගැනීම සඳහා ඉන්දියානු රජය සමග ගිවිසුම්ගත වීමට සෞඛ්ය අමාත්යාංශය තීරණය කොට ඇති බව පසුගිය ජූලි මස 23 වන දා වර්තමාන සෞඛ්ය අමාත්ය වෛද්ය රමේෂ් පතිරණ විසින් නිකුත් කරන ලද කැබිනට් පත්රිකාවෙන් පෙන්නුම් කෙරෙන බවයි සභාපතිවරයා පැවසුවේ.
අඩු මිලට ගුණාත්මක ඖෂධ අඛණ්ඩව ගෙන ඒම සඳහා ඉන්දියානු ජන ඖෂධ යෝජනා ක්රමය හරහා කටයුතු කිරීමට ගෙන ඇති පියවර තමන් විසින් දීර්ඝ කාලයක් මුළුල්ලේ සඳහන් කරන ලද ප්රතිකර්මයක් ප්රායෝගිකව ක්රියාත්මක වීමක් බව හෙතෙම මෙහිදී වැඩිදුරටත් සඳහන් කළා.
ශ්රී ලංකාව තුළ සෞඛ්ය සේවය අඛණ්ඩව පවත්වාගෙන යාම සඳහා අවශ්ය කරන ඖෂධ වර්ග 862ක් හඳුනාගෙන ඇති බවත්
ඉතා වැදගත් ඖෂධ 14ක්, අත්යවශ්ය ඖෂධ 474ක්, අත්යවශ්ය නොවන ඖෂධ 180 ක් ලෙස මෙය වර්ගකොට ඇති බවත් ඒ මහතා පෙන්වා දුන්නා.
කෙසේ නමුත් මෙම කැබිනට් පත්රිකාවේ දී රාජ්ය ඖෂධ නිෂ්පාදන නීතිගත සංස්ථාව ඉන්දියානු සමාගමක් සමග අවබෝධතා ගිවිසුමක් අත්සන් කරන බව සඳහන් කොට ඇති අතර මෙම සමාගම ඉන්දියාවේ පවුල් සැලසුම් උපකරණ නිෂ්පාදන සමාගමක් බවට අන්තර්ජාලය ඔස්සේ කරුණු නිරීක්ෂණයේ දී තහවුරු වන බවත් එවන් සමාගමකට පෙර සඳහන් කර ආකාරයට මෙරටට විවිධත්වයකින් යුතු ඖෂධ වර්ග සැලකිය යුතු ප්රමාණයක් සැපයීමට පවතින හැකියාව ප්රශ්නසහගත බැවින් වහාම මෙම සමාගම සම්බන්ධයෙන් පසු විපරමක් සිදු කරන ලෙසයි විශේෂඥ වෛද්ය චමල් සංජීව ඉල්ලා සිටින්නේ.
