පසුගිය 20 වැනිදා රාත්‍රි කොළඹ යුනියන් පෙදෙසේ පිහිටි රාත්‍රි සමාජ ශාලාවකදී හිටපු ජනපති මහින්ද රාජපක්ෂ මහතාගේ පුත් යෝෂිත රාජපක්ෂ මහතා ඔහුගේ බිරිඳ සමග පැමිණ සිටියදී බහින්බස්වීමක් දුරදිග ගොස් එහි රාජකාරියේ යෙදී සිටි ආරක්ෂක නිලධාරියකුට පහරදීමේ සිද්ධියට අත්අඩංගුවට ගත් සිව් දෙනකු ලබන 01 වැනිදා දක්වා රක්ෂිත බන්ධනාගාරගත කිරීමටත් ලබන 01 වැනිදා හඳුනා ගැනීමේ පෙරට්ටුවකට ඉදිරිපත් කරන ලෙසත් කොටුව මහෙස්ත්‍රාත් නිලුපුලි ලංකාපුර මෙනවිය ඊයේ (27දා) නියෝග කළා.
එම සැකකරුවන් ඕනෑම ඇප කොන්දේසියක් යටතේ ඇප මත මුදාහරින ලෙසට ඔවුන් වෙනුවෙන් පෙනී සිටි නීතිඥවරුන් කළ ඉල්ලීම ප්‍රතික්ෂේප කළ මහෙස්ත්‍රාත්වරිය එම සැකකරුවන් හතර දෙනා ලබන 01 වැනිදා හඳුනාගැනීමේ පෙරට්ටුවකට ඉදිරිපත් කරන ලෙසට නියෝග කළා.
යෝෂිත රාජපක්ෂ මහතාගේ සගයන් යැයි කියන එම සැකකරුවන් සිව්දෙනා ප්‍රකාශ ලබාදීමට පසුගිය 26 වැනිදා පැමිණි අවස්ථාවේදී ප්‍රකාශ සටහන් කළ කොම්පඤ්ඤ වීදිය පොලිසිය මගින් ඔවුන් අත්අඩංගුවට ගෙන කොළඹ මධ්‍යම අපරාධ කොට්ඨාසයට භාර දී තිබුණා.
යෝෂිත රාජපක්ෂ මහතා සහ ඔහුගේ බිරිඳ එකී සැකකරුවන් ඇතුළු තවත් පිරිසක් සමග එම සමාජ ශාලාවට ගොස් ඇති බවත් හඳුනා ගැනීමේ අත්පලඳනා පැළඳ ඇතුල්වන ලෙස පහරකෑමට ලක් වූ ආරක්ෂක නිලධාරියා යෝෂිත රාජපක්ෂ මහතාට සහ ඔහුගේ බිරිඳට කළ ඉල්ලීම ප්‍රතික්ෂේප කළ අවස්ථාවේ දී එකී සැකකරුවන් එම ආරක්ෂක නිලධාරියාට පහර දී ඇති බවත් විමර්ශන නිලධාරීහු අධිකරණයට පැවසුවා.
ඒ සම්බන්ධයෙන් කොම්පඤ්ඤ වීදිය පොලිසිය යෝෂිත රාජපක්ෂ මහතාගෙන් හා ඔහුගේ බිරිඳගෙන් ද ප්‍රකාශ සටහන් කරගෙන තිබුණා.
