2023 ක්රිකට් ලෝක කුසලාන අවසන් මහා තරගයේ දී ඉන්දීය කණ්ඩායමට ප්රමාණවත් සහයක් ලබා නොදීම සම්බන්ධයෙන් අහමදාබාද් හි නරේන්ද්ර මෝදි ක්රීඩාංගණයට රැස්ව සිටි ප්රේක්ෂකයින්ට සමාජ මාධ්ය ඔස්සේ මේ වනවිට දෝෂාරෝපණ එල්ල වෙමින් පවතිනවා.
ලෝක කුසලානයේ අවසන් මහා තරගයේ දී කිරුළ සඳහා ඉන්දීය කණ්ඩායමට සහායවීමට නිල් පැහැති ඇඳුමින් සැරසුණු එක්ලක්ෂ තිස්දහසක පමණ පිරිසක් ඊයේ ක්රීඩාංගණයට රැස්ව සිටියා.
කෙසේ වෙතත් පිටියේ හතරේ සීමාවෙන් ඇතුළත ඕස්ට්රේලියානු ක්රීඩකයින් 11 දෙනා ආධිපත්යය දැරීමත් සමඟ ඉන්දීය ප්රේක්ෂකාගාරය මීයට පිම්බා සේ නිහඬ වුණා.
එලෙස නිශ්ශබ්ද වීම හේතුවෙන් ඉන්දීය සමාජ මාධ්ය තුළ මෝදි ක්රීඩාංගණයට රැස්ව සිටි ප්රේක්ෂකයින්ට මේ වනවිට දෝෂාරෝපණ එල්ල කරන්නට පටන්ගෙන තිබෙනවා.
තරගයට පෙර දිනයේ දී ඕස්ට්රේලියානු නායක පැට් කමින්ස් ප්රේක්ෂකාගාරය නිශ්ශබ්ද කිරීම තම අරමුණ බව පවසා තිබූ පසුබිමක එම අරමුණ සාර්ථක කර ගැනීමට මෝදි ක්රීඩාංගණයට රැස්ව සිටි ප්රේක්ෂකයින් සහාය වූ බවටයි චෝදනා කරන්නේ.
රෝහිත් ෂර්මාගේ කණ්ඩායමට වඩාත් අවශ්ය වූ අවස්ථාවලදී පවා කණ්ඩායමේ මනෝභාවය ඉහළ නැංවීමට ප්රේක්ෂකාගාරය අපොහොසත් වීම ගැන මෙලෙස දොස් පවරා ඇති බවයි ඉන්දීය මාධ්ය අද වාර්තා කර තිබුණේ.
ඉන්දීය පිළට අවසන් මහා තරගය ජයගැනීමට නොහැකි බව වටහාගෙන ඇතැම් ක්රීඩාලෝලීන් වේලාසනින්ම ක්රීඩාංගණයෙන් ඉවත්ව ගිය ආකාරය ද දැකගත හැකි වුණා.
කෙසේ වෙතත් තරගයෙන් අනතුරුව පැට් කමින්ස් ප්රකාශ කළේ ප්රේක්ෂකයින් නිහඬව සිටීම ගැන තමා සතුටු වන බවයි.
