මෙවර පොසොන් උත්සව සතිය ජුනි මස 06 වැනි දිනෙන් ආරම්භ වී ජුනි මස 13 වැනි දින තෙක් පැවැත්වීමට තීරණය කර තිබෙනවා.
වාර්ෂිකව පවත්වන ජාතික පොසොන් උත්සවය සඳහා වන පළමු කමිටු රැස්වීමේදියි මේ බව ප්‍රකාශයට පත් කෙරුණේ.
අනුරාධපුර දිස්ත්‍රික් ලේකම් කාර්යාලීය ශ්‍රවණාගාරයේ දී අටමස්ථානාධිපති, ශ්‍යාමෝපාලි මහා නිකායේ මල්වතු පාර්ශ්වයේ නුවර කලාවිය ප්‍රධාන සංඝනායක ආචාර්ය පූජ්‍ය පල්ලේගම හේමරතන නා හිමිපාණන් වහන්සේ ඇතුළු අටමස්ථානාධිපති නාහිමිවරුන්ගේ අනුශාසනාවෙන් හා වැඩමවීමෙන් මෙය සිදු කෙරුණා.
ජුනි මස 06 වන දින ඉසුරුමුණි රජමහා විහාරස්ථානයෙන් පැන් පෙරහැර ආරම්භ වී මහමෙව්නා උයනේ පිහිටා ඇති සති පිරිත් මණ්ඩපයේ දී පිරිත් පේ කිරීම සිදු කිරීමෙන් අනතුරුව ජුනි මස 07 වන දින සිට සති පිරිත් පිංකම ආරම්භ වනු ඇති.
සංස්කෘතික කටයුතු දෙපාර්තමේන්තුවේ සම්බන්ධිකරණයෙන් රුවන්වැලි සෑ මළුවේ දී සිදු කරන සර්ව රාත්‍රික හේවිසි පූජාව මෙවරත් ශිල්පීන් 50 දෙනෙකුගේ සහභාගිත්වයෙන් පැවැත්වීම සාකච්ඡා කෙරුණු බවයි දසත ප්‍රාදේශීය වාර්තාකරු පැවසුවේ.
භක්ති ගීත, ජලය, විදුලිය, සනීපාරක්ෂක පහසුකම්, අනාරක්ෂිත ගස් ඉවත් කිරීම, වෙළෙඳ ප්‍රචාරණ, සැරසිලි, දන්සල්, සුරාසැල් හා මස්කඩ වැසීම, පරිසරය, ආරක්ෂාව ආදිය පිළිබඳව කටයුතු සිදු කළ යුතු ආකාරය මෙහිදී වැඩිදුරටත් සාකච්ඡා කෙරුණා.
නව තාක්ෂණය ද යොදා ගනිමින් මෙවර ජාතික පොසොන් උත්සවය වෙනුවෙන් පැමිණෙන දහස් සංඛ්‍යාත බැතිමතුන් වෙනුවෙන් පහසුකම් සැපයිමට කටයුතු සැලසුම් කරන බවත් ඒ සඳහා සියලු රාජ්‍ය හා රාජ්‍ය නොවන සංවිධාන ඇතුළු පාර්ශ්වකරුවන්ගේ සහයෝගය අපේක්ෂා කරන බව ද අනුරාධපුර දිස්ත්‍රික් ලේකම්, පොසොන් උත්සව කමිටුවේ සභාපති කේ.ජී.ආර්.විමලසූරිය මහතා සඳහන් කළා.
