ශ්රී ලංකාවේ වෙසෙන සියලු ම විදෙස් සංචාරකයින්ගේ ආරක්ෂාව උපරිමයෙන් ම සහතික කර ඇති බව වැඩබලන පොලිස්පති ප්රියන්ත වීරසූරිය මහතා පවසනවා.
අද (23) පස්වරුවේ ආරුගම්බේ සංචාරක කලාපයේ ඇති වූ කලබලකාරී තත්ත්වය සහ එම ප්රදේශවල සංචාරය කරන සංචාරකයින් ඉලක්ක කරගනිමින් එල්ල විය හැකි බවට මෙරට අමෙරිකානු තානාපති කාර්යාලය නිකුත් කළ නිවේදනය ප්රකාරව අදහස් දක්වමින් වැඩබලන පොලිස්පතිවරයා මේ බව සඳහන් කළා.
මැදපෙරදිග යුද්ධයත් සමග ශ්රී ලංකාවටත් ඉන් යම්කිසි තර්ජනයක් ඇති වේ යැයි යන තොරතුර බුද්ධි අංශ වෙතින් ඔක්තෝබර් 07 වැනි දින ලැබුණු බවත්; එදා සිට ආරක්ෂක කවුන්සිලය රැස් වී ගත යුතු ක්රියාමාර්ග පිළිබඳව සාකච්ඡා කළ බවත්; එම තීන්දු අනුව දැඩි ආරක්ෂාවක් එම කලාපයේ සේම රට පුරා පූජා නගර, හෝටල් ආදි විශේෂ ස්ථාන කේන්ද්ර කරගනිමින් යොදා ඇති බව ද ප්රියන්ත වීරසූරිය මහතා පැවසුවා.
එමෙන්ම මෙම බුද්ධි තොරතුරු ලැබීම් සම්බන්ධයෙන් නිරතුරුව කොන්සල් ජනරාල්වරුන් සමග සබඳතා පැවැත්වූ බවත්; ඊයේ (22) සහ අද උදෑසන ද ජනාධිපති ලේකම්, මහජන ආරක්ෂක අමාත්යාංශ ලේකම්, ආරක්ෂක අමාත්යාංශ ලේකම් සහ ත්රිවිධ හමුදාපතිවරුන් රැස් ව තවදුරටත් මේ ගැන සාකච්ඡා කළ බවයි වැඩබලන පොලිස්පතිවරයා මහජනතාවට දැනුම්දුන්නේ.
ආරුගම්බේ කලාපයට ප්රහාරයක් එල්ල වීමේ අවදානමක් ගැන නිල බුද්ධි තොරතුරු ඊයේ ලැබීමත් සමග එම ප්රදේශ අධි ආරක්ෂිත කලාප බවට පත් කිරීමට සැලසුම් ක්රියාත්මක වුණු බව ද ප්රියන්ත වීරසූරිය මහතා පැවසුවා.
එබැවින් මේ වනවිට මෙරට ජීවත් වන හෝ සංචාරය කරන විදේශිකයින්ගේ ආරක්ෂාව ඉහළින් සනාථ කර ඇති බවයි වැඩබලන පොලිස්පතිවරයා වැඩිදුරටත් කියා සිටියේ.
කිසියම් සැක කටයුතු සිදුවීමක් හෝ පුද්ගලයෙක් ගැන දැනුම්දීමට ළඟම ඇති පොලිස් ස්ථානයට හෝ නැත්නම් 1997 ක්ෂණික දූරකථන අංකයට දැනුම්දෙන ලෙස ද ශ්රී ලංකා පොලිසිය මහජනතාවගෙන් ඉල්ලා සිටිනවා.
