තම මියගිය අලුත උපන් පැටිවාගේ සිරුර හිස මත තබාගෙන සැතපුම් 1,000ට වඩා වැඩි දුරක් පිහිනා යන තල්මස් මවක් පිළිබඳ පුවතක් විදෙස් මාධ්‍ය වාර්තා කරනවා.
වොෂිංටන් ප්‍රාන්තයේ තල්මසුන් පර්යේෂණ මධ්‍යස්ථානය පැවසුවේ ටෙල්ක්වා ලෙස ප්‍රසිද්ධ මෙම තල්මස් මවගේ පැටියා අලුත් අවුරුදු දා මියගොස් ඇති බවයි.
මෙම තල්මස් මව ඇයගේ පැටියා සමඟ පසුගිය දෙසැම්බර් 20 වනිදා පළමුවරට නිරීක්ෂණය වූ බවත්, එම අවස්ථාවේ පැටියා ජීවතුන් අතර සිටි බවත් වොෂිංටන් ප්‍රාන්තයේ තල්මසුන් පර්යේෂණ මධ්‍යස්ථානය වැඩිදුරටත් සඳහන් කරනවා.
කෙසේ වෙතත් පසුගිය පළමුවනදා මෙම තල්මසා තම පැටවාගේ මියගිය සිරුර හිස මත තබාගෙන සියැටල් මුහුදේ පිහිනන අයුරු ජාතික සාගර හා වායුගෝලීය පරිපාලනයේ පර්යේෂකයන් ඡායාරූප ගතකර තිබෙනවා.
මීට පෙර ද 2018 වසරේ දී මෙම තල්මස් මව මේ ආකාරයෙන්ම මියගිය තම පැටවාගේ සිරුර හිසෙන් තල්ලු කරමින් දින 17ක් සැතපුම් දහස් ගණනක් පීනා ඇති බවටයි තොරතුරු ආනාවරණය වී ඇත්තේ.
ඇයට මේ වනවිට ලේඛනගත පැටවුන් දෙදෙනෙකු අහිමි වී ඇති අතර, ඔවුන් දෙදෙනාම ගැහැණු සතුන් බවයි වාර්තා වුණේ.
මෙම තල්මස් මවගේ පළමු පැටවා මීට වසර 14 කට පෙර උපත ලැබූ අතර, තවමත් එම සත්වයා ජීවතුන් අතර සිටින බවයි පර්යේෂකයින් පවසන්නේ.
