ඉන්ධන ප්‍රවාහන දුම්රියක ගැටීමෙන් අද (18) අලුයම වන අලි දෙදෙනෙක් මිය යාමේ සිද්ධිය සම්බන්ධයෙන් පරීක්ෂණයක් ආරම්භ කරන බව දුම්රිය දෙපාර්තමේන්තුව සඳහන් කරනවා.
මෙම දුම්රිය අධික වේගයෙන් එම ස්ථානයේ ධාවනය වූයේ ද යන්න පිළිබද සොයා බලන බවයි නියෝජ්‍ය දුම්රිය සාමාන්‍යාධිකාරි එන්.ජේ ඉදිපොළගේ සඳහන් කළේ.
ගල්ඔය සහ හිඟුරක්ගොඩ අතර මින්නේරිය, රොටවැව දී වන අලි රංචුවක් දුම්රියේ ගැටීමෙන් මෙම අනතුර සිදුව ඇති අතර, අනතුරින් පසු දුම්රිය පීලි පැනීමකට ද ලක්ව තිබෙනවා.
ඉන්ධන ප්‍රවාහන ටැංකි හතරක් මෙලෙස පීලි පැනීමට ලක්ව ඇති අතර, අනතුරින් තුවාල ලැබූ තවත් වන අලි කිහිප දෙනෙක් කැලයට පළාගොස් ඇති බවයි වාර්තා වුණේ.
මේ අතර බරපතළ තුවාල ලැබූ තවත් වන අලියෙකුට ප්‍රතිකාර කිරීම් කටයුතු අද (18) උදෑසන ගිරිතලේ වනජීවී පශු වෛද්‍ය ඒකකයේ වනජීවී නිලධාරීන් විසින් ආරම්භ කරනු ලැබුවා.
මූලික ප්‍රතිකාරවලින් අනතුරුව එම වන අලියා සුවය ලබමින් සිටින බවයි වාර්තා වුණේ.
දුම්රියේ ගැටීමෙන් මිය ගිය සතුන් දෙදෙනා ගැහැණු සත්වයින් බවත් ඔවුන් වයස අවුරුදු 20-25ත් අතර වයසේ පසුවන සත්වයින් බවත් වනජීවී නිලධාරීන් සඳහන් කළේ.
මේ අතර මෙම අනතුරත් සමඟ මඩකලපුව – කොළඹ දුම්රිය මාර්ගයේ දුම්රිය ධාවනය සම්පූර්ණයෙන් නැවතී තිබෙනවා.
පීලි පැනීමට ලක් වූ දුම්රිය පීලිගත කිරීමේ කටයුතු දුම්රිය දෙපාර්තමේන්තු සේවකයින් විසින් ආරම්භ කර ඇති බවයි අප වාර්තාකරු සඳහන් කළේ.
පීලි පැනීමට ලක් වූ දුම්රිය ඉන්ධන ටැංකි හතරේ ඉන්ධන නළ මාර්ගයකින් ඉන්ධබ බවුසර් රථවලට පිරවීමට කටයුතු ආරම්භ කර ඇති බව ද වාර්තා වනවා.
