පෙරේදා (18) රාත්රියේ මිද්දෙණිය – කඩේවත්ත ප්රදේශයේ දී සිදු වූ වෙඩි තැබීමෙන් කරාපිටිය ශික්ෂණ රෝහලේ දැඩි සත්කාර ඒකකයේ ප්රතිකාර ලබමින් සිටි 09 හැවිරිදි දරුවා ද ජීවිතක්ෂයට පත් ව තිබෙනවා.
ඊයේ (19) රාත්රියේ දී එම පිරිමි දරුවා මියගොස් ඇති බවයි පොලිසිය තහවුරු කළේ.
මෙම වෙඩි ප්රහාරයෙන් පෙරේදා රාත්රියේ දී සිය යතුරුපැදියෙන් දරුවන් දෙදෙනා සමග ගමන් කරමින් සිටි 39 හැවිරිදි ‘කජ්ජා’ නොහොත් අරුණ විදානගමගේ යන පුද්ගලයා ද එම ස්ථානයේ දී ම ජීවිතක්ෂයට පත් වුණා.
ඔහුගේ සය හැවිරිදි දියණිය සහ 9 හැවිරිදි පුතු ද බරපතළ තුවාල ලබා තංගල්ල හා ඇඹිලිපිටිය රෝහල් වෙත ඇතුළත් කෙරුණ ද, ඊයේ අලුයම් කාලයේ දී දියණිය ද ජීවිතක්ෂයට පත් වූ බවයි වාර්තා වූයේ.
මෙම ඝාතන සඳහා නාඳුනන වෙඩික්කරුවන් දෙදෙනකු යතුරුපැදි මගින් පැමිණ තිබූ බව ද හෙළි වුණා.
තවමත් මෙම ඝාතනයට හේතුවක් නිශ්චිතව ම හෙළි වී නැති අතර මියගිය අරුණ විදානගමගේ නොහොත් කජ්ජා නමැත්තා සිය මුහුණුපොතේ ජීවිතක්ෂයට පත් වීමට දින තුනකට පෙර තැබූ සටහනක් මේ වනවිට ශීඝ්රයෙන් සමාජ මාධ්ය තුළ සංසරණය වෙමින් පවතිනවා.
මරණකරු සඳහන් කර ඇත්තේ; ”ඈත පේන මරනෙ ගැන හිතන්නෙ නැතුව. ළඟ තියන ජීවිතය ගැන හිතලා සතුටින් ඉදපල්ලා..(නොහැක්කක් නොමැත.)” යනුවෙන්.
එම සටහන සමග ඔහු වාහනයක අසුන්ගෙන සිටින දර්ශනයක් ඇතුළත් ඡායාරූපයක් ද මුහුණුපොතට එක් කර තිබෙනවා.
ඉන් හරියටම දින තුනකට පසුව කජ්ජා නමැති මෙම මරණකරු තම සය හැවිරිදි දියණිය සහ කුඩා පුතු සමග යතුරුපැදියෙන් ගමන් කරමින් සිටියදියි වෙඩි ප්රහාරයට ගොදුරු වූයේ.
මරණකරුවන් ගල්පොත්ත ප්රදේශයේ පදිංචිකරුවන්.
මෙම වෙඩිතැබීම සඳහා ටී-56 වර්ගයේ ගිනිඅවියක් භාවිතා කර ඇති බවට පොලීසිය පවසනවා.
