මිතුරන් අතර ඇති වූ ආරවුලකින් මැණික් කටුව අසළින් අත වෙන්වන ලෙස එල්ල කරන ලද කඩු පහරකින් බරපතළ ලෙස තුවාල ලැබූ පුද්ගලයෙකු ලුනාව රෝහල වෙත ඇතුළත් කර වැඩිදුර ප්රතිකාර සඳහා පානදුර රෝහලටත්, ඉන් අනතුරුව කොළඹ මහා රෝහල වෙතත් ඇතුළත් කර ඇතැයි මොරටුව පොලීසිය පවසනවා.
මොරටුව පොලිස් බල ප්රදේශයේ ලුනාවේ පිහිටි රතු කුරුස මහල් නිවාස සංකීර්ණයේ පදිංචි 29 හැවිරිදි පුද්ගලයෙකු මෙලෙස තුවාල ලබා දැඩි සත්කාර ඒකකයේ ප්රතිකාර ලබන බවයි වාර්තා වන්නේ.
එල්ල කරන ලද කඩු පහරෙන් ඔහුගේ නාසය ද බරපතළ ලෙස තුවාල වී ඇතැයි රෝහල් ආරංචි මාර්ග පවසනවා.
ලුනාව දුම්රිය මාර්ගය ආසන්නයේ මිතුරන් සිව් දෙනෙකු එකතුව මත්පැන් සාදයක් පවත්වා ඇති අතර එහිදී එක් මිතුරෙකු ඔහුගේ පියා සමග බහින්බස් වී ඇති අතර “තාත්තාට එහෙම කතා කරන්න එපා” යැයි තුවාල ලැබූ පුද්ගලයා ඔහුගේ මිතුරාට පවසා ඇති බවයි අනාවරණය වී ඇත්තේ.
එම අවවාදයට උරණ වූ මිතුරා කඩුවක් ද රැගෙනවිත් සිය සගයාට පහර දී තිබෙනවා.
එහිදී තුවාල ලැබූ පුද්ගලයා දුම්රිය මාර්ගය ආසන්නයේ සිට මහල් නිවාස සංකීර්ණය දෙසට පැමිණ ඇති අතර මාර්ගය පුරා රුධිරය විසිර තිබෙන අයුරුයි දක්නට ලැබී ඇත්තේ.
සිද්ධිය සම්බන්ධයෙන් මේ වන විට 24 හැවිරිදි පුද්ගලයෙකු අත්අඩංගුවට ගත් බව මොරටුව අපරාධ අංශයේ උසස් නිලධාරියෙකු ප්රකාශ කළා.
අත්අඩංගුවට ගත් පුද්ගලයා මොරටුව මහේස්ත්රාත් අධිකරණය වෙත ඉදිරිපත් කිරීමට නියමිතයි.
