මැතිවරණය ප්‍රකාශයට පත් කළ ද; රටේ සංවර්ධනය සඳහා ක්‍රියාත්මක කෙරෙමින් පවතින ව්‍යාපෘති නතර කිරීමේ අවශ්‍යතාවක් නොමැති බව මැතිවරණ කොමසාරිස් ජනරාල් සමන් ශ්‍රී රත්නායක මහතා පවසනවා.
මැතිවරණ කොමසාරිස්වරයා පෙන්වාදෙන්නේ; කිසිදු අයුරකින් අපේක්ෂකයෙකු මැතිවරණ කාල සීමාව තුළ දී ප්‍රවර්ධනය කිරීමක් හෝ අගති පැමිණවීමක් අදාළ සංවර්ධන ව්‍යාපෘතිවලට මුවා වී සිදු නොකළ යුතු බවයි.
එළඹෙන සැප්තැම්බර් මස 21 වැනි දින පැවැත්වීමට නියමිත ජනාධිපතිවරණය සඳහා මේ වනවිට දේශපාලන පක්ෂ, අපේක්ෂකයින් සේ ම ක්‍රියාවලිය සිදු කරනු ලබන මැතිවරණ කොමිෂන් සභාව, මැතිවරණ ලේකම් කාර්‍යාලය ඇතුළු ප්‍රමුඛ පාර්ශ්ව ගණනාවක් සිය ක්‍රියාදාමයන් ඉටු කරමින් සිටිනවා.
මෙවන් පසුබිමකදී මේ වනවිට ජනාධිපතිවරණය සඳහා මැතිවරණ ආරවුල් නිරාකරණ මධ්‍යස්ථාන සම්බන්ධීකරණ තොරතුරු ලබා ගැනීමේ පහසුව පිණිස කොමිෂන් සභාව විසින් විශේෂ නිවේදනයක් ද නිකුත් කෙරුණා.
ඒ මැතිවරණ ආරවුල් නිරාකරණ මධ්‍යස්ථාන සම්බන්ධීකරණ තොරතුරු ලබා ගැනීමට දිවයින පුරා දිස්ත්‍රික්ක 25 ම පදනම් කරගනිමින් සියලු ම දිස්ත්‍රික්ක ලේකම් කාර්‍යාලවල දූරකථන අංක, විද්‍යුත් තැපැල් ලිපින සහ වට්ස් ඇප් මාර්ගයෙන් සම්බන්ධ වීමට අවශ්‍ය ඇමතුම් අංක ලැයිස්තුවක් මැතිවරණ කොමිෂන් සභාව මගින් ඡන්ද දායකයින්ගේ දැනුම්වත් වීම වෙනුවෙන් මාධ්‍යයට මුදා හැර තිබෙනවා.
එමෙන්ම මැතිවරණ නීති උල්ලංඝනය කිරීමේ සිදුවීම් සම්බන්ධයෙන් වන පැමිණිලි ජූලි මස 31 වැනි දා සිට මේ දක්වා කාලය තුළ ඉහළ ගොස් තිබෙනවා.
ඒ අනුව පැමිණිලි 121ක් මැතිවරණ කොමිෂන් සභාවට මේ වනවිට ලැබී ඇති බවයි පැවසෙන්නේ.
මේ අතර මේ වනවිට එළඹෙන ජනාධිපතිවරණය වෙනුවෙන් අපේක්ෂකයින් 18 දෙනෙකු ඉදිරිපත් වන බවට දන්වමින් ඊට අදාළ ඇප මුදල් තැන්පත් කිරීම ද සිදු කර තිබෙනවා.
එහිදී පිළිගත් දේශපාලන පක්ෂ නියෝජනය කරමින් අපේක්ෂකයින් 07 දෙනෙකු ද, ස්වාධීන පක්ෂ නියෝජනය කරමින් අපේක්ෂකයින් 10 දෙනෙකු සහ වෙනත් පක්ෂ නියෝජනය කරමින් එක් අපේක්ෂකයෙකු ද මෙම 18 දෙනාට ඇතුළත් බවයි වාර්තා වන්නේ.
