මාලදිවයිනේ ස්කැවේටර් යන්ත්‍ර රියදුරුවරයෙකු ලෙස රාජකාරියේ නියුතු ව සිටි ශ්‍රී ලාංකිකයෙකු දියේ ගිලීමෙන් ජීවිතක්ෂයට පත් ව තිබෙනවා.
තොරතුරු වාර්තා වන පරිදි මෙම ලාංකිකයාගේ මෘත දේහය අද (16) අලුයම ඔහුගේ ඥාතීන් විසින් මෙරට දී භාරගෙන ඇති බවයි වාර්තා වන්නේ.
මෙසේ මියගොස් ඇත්තේ දොඩංගස්ලන්ද – උඩු හොරම්බුව ප්‍රදේශයේ පදිංචි 33 හැවිරිදි පුද්ගලයෙක්.
මෙම පුද්ගලයා මීට දින 15කට පමණ පෙර සිය නවාතැන් පොළෙන් මීටර් 300ක් පමණ දුරින් පිහිටි මුහුදු ප්‍රදේශයක දිය නාමින් සිටි ඇති බවත් එහිදී ඔහු දියේ ගිලී ගොස් ඇති බවත් වාර්තා වනවා.
අනතුරුව දින දෙකකට පසුව ඔහුගේ සිරුර මුහුදේ පාවෙමින් තිබියදී එරට වැසියෙකු එය දැක මාලදිවයින පොලිසියට දැනුම්දී ඇති බවයි වාර්තාකරු පැවසුවේ.
මාලදිවයින අධිකරණ වෛද්‍ය වාර්තා අනුව මෙම මරණය දියේ ගිලීමෙන් සිදු වූවක් බවටයි එරට රජය මෙන් ම මීගමුව jmo විසින් තහවුරු කරනු ලැබුවේ.
මෙයට පෙර ද වසර තුනක පමණ කාලයක් මාලදිවයිනේ මොහු රැකියාව කර ඇති අතර දැනට මාස 03කට පමණ පෙර නැවත රාජකාරිය සඳහා එරටට ගොස් තිබෙනවා.
මොහු මාස 05ක් පමණ වන බිළිඳෙකුගේ පියෙකු ද බවයි වාර්තා වන්නේ.
