මාර්ග ගත ක්‍රමයට වෙන් කරන ලද සංචාරක හෝටලයක් වසර පහක පමණ කාලයක සිට වසා දමා ඇති බව දැන ගැනීමෙන් තමන් දැඩි අපහසුතාවයකට පත්වූ බව මෙරටට පැමිණි ඉතාලි සංචාරකයෙක් පවසනවා.
මේ සම්බන්ධයෙන් අදාළ විදෙස් ජාතිකයා කල්පිටිය පොලිසියට පැමිණිල්ලක් සිදුකර ඇති බවයි වාර්තා වුණේ.
ඉතාලියේ රෝමය නගරයේ පදිංචිකරුවෙකු වන මෙම විදෙස් ජාතිකයා පසුගිය 09 වනදා මෙරටට පැමිණ මීගමුව ප්‍රදේශයේ සංචාරක හෝටලයක නවාතැන් ගෙන තිබෙනවා.
පසුව ඔහු මාර්ග ගත ක්‍රමය ඔස්සේ කල්පිටිය, සේතාවාඩිය ප්‍රදේශයේ ඇති බව කියන සංචාරක හෝටලයක් වෙන් කරගෙන ඇති බව සඳහන්.
එලෙස වෙන්කරගත් හෝටලයට එම විදෙස් ජාතික සංචාරකයා ඊයේ (13) දිනයේ පැමිණ ඇති අතර, එහිදී ඔහුට දැනගන්නට ලැබී ඇත්තේ එම හෝටලය වසර 05ක පමණ කාලයක සිට වසා දමා ඇති බවයි.
මේ හේතුවෙන් තමන් දැඩි අපහසුතාවයට පත්වූ බවයි එම විදෙස් ජාතිකයා පොලිසියට පැමිණිලි කරමින් පවසා ඇත්තේ.
කෙසේ වෙතත් එම විදෙස් ජාතිකයා සංචාරකයා කල්පිටිය, සේතාවාඩිය ප්‍රදේශයේ පිහිටි වෙනත් හෝටලයකට යොමුකිරීමට කල්පිටිය පොලිසිය කටයුතු කර තිබෙනවා.
