මාර්ගයක් ප්රතිසංස්කරණය කර දෙන ලෙස ජනාධිපතිවරයාට ලිපියක් භාර දීමෙන් පසුව ආබාධිත සෙබළෙකුට පුද්ගලයන් දෙදෙනෙකු විසින් පහර දීමේ සිද්ධියක් ගලෙන්බිඳුණුවැව ප්රදේශයෙන් වාර්තා වේ.පසුගිය දා ගලෙන්බිඳුණුවැව, පලුගස්වැව පැවති උතුරු මැද පළාත් මහඇළ, උමං ඇළ මාර්ගයේ සංවර්ධන කටයුතු ආරම්භ කිරීමේ උත්සවයේදී අදාළ සෙබළා ජනාධිපතිවරයාට ලිපියක් භාර දී තිබිණි.ඒ, වසර 40ක පමණ කාලයක සිට සංවර්ධනයට ලක් නොවූ ගලෙන්බිඳුණුවැව, දාච්චිහල්මිල්ලෑව සිට මරදන්කඩවල, ගනේවල්පොළ දක්වා කිලෝමීටර් 45ක් පමණ දුරකින් යුත් මාර්ගය ප්රතිසංස්කරණය කර දෙන ලෙස ඉල්ලමිනි.
එම ලිපිය ජනාධිපතිවරයාට භාර දීම නිසා උරණ වූ බව කියන එම ප්රදේශයේ ම පදිංචි පිය පුතු දෙපළක් ඊයේ (6) දිවා කාලයේදී අදාළ සෙබළාට පහර දී ඇතැයි අප වාර්තාකරු පවසයි.පාර සාදා දෙන්න යැයි ජනාධිපතිවරයාගෙන් ඉල්ලීමට තමාට ඇති අයිතිය කුමක්දැයි අසමින් තම කෘත්රිම පාදය ගළවා එය බිඳ දමා තමාගේ ජංගම දුරකතනය ද උදුරාගෙන අලාභහානි කළ බව පහර කෑමට ලක් වූ සෙබළා පැවසීය.
මේ අතර තුවාල ලැබූ සෙබළා අනුරාධපුර ශික්ෂණ රෝහලට ප්රතිකාර සඳහා ඇතුළත් කර ඇත.සෙබළාට පහර දුන් බව කියන පුද්ගලයින් දෙදෙනා ද ආබාධිත සෙබළා විසින් තමනට පහර දුන්නේ යැයි පවසා ගලෙන්බිඳුණුවැව, යකල්ල රෝහලට ඇතුළත්ව ඇතැයි වාර්තා වේ.
