ලබන මහ කන්නයේ සිට යූරියා පොහොර මිටියක මිල රුපියල් 5000ට වඩා අඩු මුදලකට ගොවීන්ට ලබා දීමට රජය කටයුතු කරන බව කෘෂිකර්ම අමාත්‍ය මහින්ද අමරවීර මහතා පවසනවා.
අමාත්‍යවරයා මෙම අදහස් පළ කළේ ඊයේ (10) තිස්සමහාරාමයේ පැවැති ගොවි හමුවකට සහභාගි වෙමින්.
තරුණ කෘෂි ව්‍යවසායකත්ව ගම්මාන වැඩ සටහන ඊයේ හම්බන්තොට ජුල්පල්ලම හා කාවන්තිස්සපුර යන ප්‍රදේශවල දී ආරම්භ වූ අතර ඒ සඳහා පැවැති ගොවි ජන හමුවට සහභාගි වෙමින් අමාත්‍යවරයා මෙම අදහස් පළ කළා.
වැඩිදුරටත් අදහස් දැක්වූ අමාත්‍යවරයා..
“පසුගිය කාලයේ පොහොර ඇටයක්වත් ගොවි ජනතාවට ලැබුනේ නැහැ. එවැනි වකවානුවක අපි 2022 යල කන්නයේ දී යූරියා පොහොර ගොවි ජනතාවට ලබා දුන්නා. ඒ වනවිට වෙළෙඳ පළේ යූරියා පොහොර මිටියක මිල රුපියල් 42,000ත් ඉක්මවා ගොස් තිබුනා. නමුත් අපි රුපියල් 10,000ට දුන්නා. ඒ සමගම පුද්ගලික අංශය විසින් පොහොර මිල අඩු කිරීම නිසා මේ වනවිට යූරියා මිල රුපියල් 11,000 දක්වා අඩු වුණා. නමුත් පසුගිය මහ කන්නයේ අපි ගොවීන්ට බන්ඩි පොහොර හා යූරියා පොහොර දෙකම දුන්නා. ඒ වගේම මෙවර යල කන්නයේ අපි රජය වශයෙන් මඬ පොහොර සියලු ගොවීන්ටම නොමිලයේ දුන්නා. වගා කන්න තුනකට පසුව මෙවර මහ කන්නයේ දී ගොවීන්ට මඩපොහොර, යූරියා පොහොර හා බන්ඩි පොහොර යන පොහොර වර්ග තුනම ලබා දීමට පියවර ගත්තා. පසුගිය මහ කන්නයේ දී රුපියල් 19,500ට ලබා දුන් බන්ඩි පොහොර අපි මෙවර රුපියල් 15,000 දක්වා රුපියල් 4,500කින් අඩු කළා. ඒ වගේම ලබන මහ කන්නයේ දී අපි යූරියා පොහොර මිල තවත් අඩු කරනවා. දැන් පුද්ගලික අංශයේ පොහොර මිල වැඩි කර තිබෙනවා. යූරියා පොහොර මෙට්‍රික් ටොන් 22,500ක් සහිත නැවක් අද වරායට ආවා. අපි මේවා ලබන සඳුදා සිට සියලුම ගොවි ජන මධ්‍යස්ථානවලට යවනවා. ඒ වගේම අපි ලබන 15දා සිට යූරියා පොහොර මිටියක මිල රුපියල් 9000දක්වා අඩු කරනවා. එවිට පුද්ගලික අංශයටත් මිල අඩු කරන්න සිදු වේවි. කොහොම වුනත් ලබන මහ කන්නයේ සිට යූරියා පොහොර මිටියක මිල රුපියල් 5000ට වඩා අඩු මුදලකට අලෙවි කිරීමට අපි කටයුතු කරනවා. එතකොට ගොවි ජනතාවට එම වරප්‍රසාදය භුක්ති විඳින්න ලැබෙනු ඇති.” යනුවෙන් අමාත්‍යවරයා සඳහන් කළා.
