2015 වර්ෂයේ පැවති ජනාධිපතිවරණ සමයේ දී ලංකා සතොස හරහා රුපියල් මිලියන 53කට අධික වටිනාකමකින් යුත් කැරම් පුවරු සහ දාම් පුවරු මිල දී ගනිමින් ඒවා වෙනත් කටයුතු සඳහා යොදා ගැනීම ඇතුළු චෝදනා 06කට විත්තිකරුවන් වී සිටින හිටපු අමාත්‍ය මහින්දානන්ද අලුත්ගමගේ හා එවකට සතොස හිටපු සභාපති හා හිටපු අමාත්‍ය නලීන් ප්‍රනාන්දු යන අයට එරෙහි නඩුව එළඹෙන 19 වැනි දින තෙක් කල් තැබීමට කොළඹ විශේෂ ත්‍රිපුද්ගල විනිසුරු කමිටුව නියෝග කර තිබෙනවා.
මෙම නඩුව අද (02) ත්‍රිපුද්ගල කමිටු විනිසුරුවරුන් වන ප්‍රදීප් හෙට්ටිආරච්චි, මහේෂ් වීරමන් සහ ප්‍රදීප් අබේකෝන් යන මහත්වරුන් ඉදිරියේ කැඳවනු ලැබූ අවස්ථාවේදියි අදාළ නියෝගය නිකුත් කෙරුණේ.
එහිදී දෙවැනි විත්තිකාර මහින්දානන්ද අලුත්ගමගේ මහතාගේ විත්තියේ දෙවැනි සාක්ෂි විභාගය අවසන් කෙරුණා.
එම අවස්ථාවේ දී විත්තිය වෙනුවෙන් හිටපු ක්‍රීඩා සංවර්ධන දෙපාර්තමේන්තුවේ අධ්‍යක්ෂ ජනරාල් රංජනී ජයකොඩි මහත්මිය ද සාක්ෂි ලබා දුන්නා.
මෙලෙස අධිකරණය විසින් දෙසැම්බර් 19 තෙක් නඩු විභාගය කල් දැමුණේ; විත්තිකාර මහින්දානන්ද මහතා හට දෙසැම්බර් 12 – 18 තෙක් ප්‍රතිකාර කටයුතු සඳහා තායිලන්තය බලා යෑමට අවසරය ද ඉල්ලා සිටිමින්.
ඒ අනුව අධිකරණය නියෝග කළේ එම කාලසීමාව සම්බන්ධයෙන් දුන් අවසරය ගැන ආගමන හා විගමන පාලකවරයා ඇතුළු නිලධාරීන්ට දන්වා යවන ලෙසයි.
ඒ අනුවයි දෙසැම්බර් 19 වැනිදා යළිත් මෙම නඩුව කැඳවනු ලබන්නේ.
