හෙට (04) පස්වරුවේ දිවයිනට ඒමට නියමිත ඉන්දීය අග්‍රාමාත්‍ය නරේන්ද්‍ර මෝදි තමන්ගේ ලංකාගමනය පිළිබඳ ව X සටහනක් තබා තිබෙනවා.
එහි දැක්වෙන්නේ; මෝදි අග්‍රාමාත්‍යවරයා හෙට සිට අප්‍රේල් මස 06 දක්වා කාලය තුළ ශ්‍රී ලංකාවේ සංචාරය කිරීමට සූදානමින් සිටින බවයි.
එම X සටහනේ වැඩිදුරටත් දැක්වෙන්නේ මෙසේයි;
”මගේ ශ්‍රී ලංකා සංචාරය අප්‍රේල් 4 වනදා සිට 6 වනදා දක්වා සිදු වනවා. ජනාධිපති අනුර කුමාර දිසානායක මහතාගේ සාර්ථක ඉන්දීය සංචාරයෙන් පසුව මෙම සංචාරය සිදු කෙරෙනවා. අපි බහුවිධ ඉන්දියා- ශ්‍රී ලංකා මිත්‍රත්වය සමාලෝචනය කර සහයෝගීතාවයේ නව මාර්ග සාකච්ඡා කිරීමට බලාපොරොත්තු වනවා. ඒ වෙනුවෙන් ඇති විවිධ සාකච්ඡා සඳහා ද මම එක්වීමට තීරණය කර තිබෙනවා..” යනුවෙන්.
මීට අමතර ව බිම්ස්ටෙක් රටවල් වන තායිලන්තය සහ ශ්‍රී ලංකාව සමග දීර්ඝ සහයෝගීතා ඇති කරගැනීම වෙනුවෙන් ද මෙම නිල සංචාරය සිදු කරන බව ද මෝදි සිය X සටහනේ දක්වා තිබෙනවා.
මේ වනවිට බිම්ස්ටෙක් සමුළුව සඳහා තායිලන්තයේ බැංකොක් හි රැඳී සිටින ඉන්දීය අගමැතිවරයා හෙට ශ්‍රී ලංකාවට ඒමට පෙර තායිලන්තයේ අගමැති පේටොංටාර්න් ෂිනවත්‍රා හමු වී ඉන්දීය – තායිලන්ත මිත්‍රත්වයේ වර්ධනය ගැනත් හෙට දිනයේ දී පෙරවරුවේ බිම්ස්ටෙක් සමුළුව ඇමතීමට ද සූදානමින් සිටින බව වාර්තා වනවා.
