මහනුවර අධිකරණ සංකීර්ණය බෝම්බයක් ඇති බවට 119 පොලිස් හදිසි ඇමතුම් අංකයට ව්‍යාජ දුරකථන ඇමතුමක් ලබාදුන් පුද්ගලයා ගිනිගත්හේන පොලිසිය මඟින් අත්අඩංගුවට ගෙන තිබෙනවා.
ගිනිගත්හේන, කඩවල ප්‍රදේශයේ දී මෙම පුද්ගලයා අද (02) දහවල් අත්අඩංගුවට ගෙන ඇති අතර, ඔහු වයස අවුරුදු 53ක පුද්ගලයෙක්.
සැකකරු පෞද්ගලික බස් රථයක කොන්දොස්තරවරයෙකු වශයෙන් සේවය කර ඇති අතර අත්අඩංගුවට ගැනීමෙන් පසු ඔහු පවසා ඇත්තේ තම දුරකථනය ඇද (01) දින දහවල් අස්ථානගත වූ බවයි.
බෝම්බ බියක් හේතුවෙන් අද (02) පෙරවරුවේ මහනුවර අධිකරණයේ වැඩ කටයුතු අඩාල වුණා.
අධිකරණ පරිශ්‍රයේ බෝම්බයක් ඇති බවට 119 පොලිස් හදිසි ඇමතුම් ඒකකයට ලැබුණු ඇමතුමක් මත මෙම නොසන්සුන්කාරී තත්ත්වය ඇති වුණා.
කෙසේ වෙතත් පොලිසිය ආරක්ෂක අංශ සමඟ එක්ව අධිකරණ පරිශයේ සිටි පිරිස් ඉන් පිටතට යොමුකර සිදුකළ පරීක්ෂාවක දී අනාවරණය වූයේ එහි බෝම්බයක් නොමැති බවයි.
මේ අතර මහනුවර අධිකරණයේ නඩු කටයුතු ජුලි 16 වනදා දක්වා කල් දැමීමටයි කටයුතු කළේ.
