මව සහ පියාගේ පහරදීම් හමුවේ නිවසින් පලාගොස් හැටන් දුම්රිය ස්ථානයේ රැදී සිටි 15 හැවිරිදි පාසල් සිසුවෙක් අද (19) උදෑසන හැටන් පොලිසිය භාරයට ගෙන තිබෙනවා.
අනුරාධපුර ප්‍රදේශයේ පදිංචි මෙම පාසල් සිසුවා කොළඹ කොටුව සිට බදුල්ල දක්වා ධාවනය වූ රාත්‍රි තැපැල් දුම්රියේ පැමිණ හැටන් දුම්රිය ස්ථානයේ බැස එහි රැඳී සිටියදී යි මෙලෙස පොලිස් භාරයට ගෙන ඇත්තේ.
තම මව්පියන් අනුරාධපුර ප්‍රදේශයේ පදිංචිව සිටින බවත් තමන් පානදුර ප්‍රදේශයේ පිහිටි මිත්තණියගේ නිවසේ රැඳී සිටිමින් පාසල් අධ්‍යාපනය හදාරා ඇති බවයි ඔහු පවසා ඇත්තේ.
10 වන වසරේ පාසල් අධ්‍යාපනය ලබමින් සිටිය දී මව්පියන් පාසලෙන් ද තමන් අස්කරගත් බවත් මෙම සිසුවා පොලිසියට පවසා තිබෙනවා.
ඉන් අනතුරුව අනුරාධපුර ප්‍රදේශයේ පිහිටි තම නිවසේ සහ පානදුර ප්‍රදේශයේ පිහිටි මිත්තණියගේ නිවසේ රැදි සිටින අවස්ථාවේ දී පියා විසින් නිවසින් පිටව යන ලෙස බලපෑම්කර ඇති බවයි මෙම සිසුවා වැඩිදුරටත් පොලිසිය හමුවේ සඳහන් කර ඇත්තේ.
සිසුවා තව දුරටත් සදහන් කර ඇත්තේ එම අවස්ථාවන්වල දී තමන්ට අමානුෂික ලෙස පහර දුන් බවත්, මවගේ සහ පියාගේ මෙම වද හිංසාවන් ඉවසාගත නොහැකිව පසුගිය 17 වනදා අනුරාධපුර සිට කොළඹ කොටුව දක්වා දුම්රියෙන් පැමිණි බවයි.
එහිදී පානදුර පිහිටි මිත්තණියගේ නිවසට යාම සඳහා තමන් බදුල්ල දුම්රියට වැරදිමකින් ගොඩ වී ඇති බවත් ඔහු සඳහන් කර තිබෙනවා.
මවගෙන් සහ පියාගෙන් සිදුවන වද හිංසා හේතුවෙන් තමන්ට යළිත් නිවසට යාමට නොහැකි බවයි මෙම සිසුවා පොලිසිය පවසා ඇත්තේ.
පොලිස් භාරයට ගත් පාසල් සිසුවාගේ ශරීරයේ පහරදුන් බවට සැක කෙරෙන තුවාල කිහිපයක් නිරීක්ෂණය වීමත් සමඟ ඔහුව දික්ඔය මුලික රෝහලේ අධිකරණ වෛද්‍යවරයා වෙත යොමුකර ඇති බව සඳහන්.
පාරිවාසය හරහා හැටන් මහේස්ත්‍රාත් අධිකරණය වෙත සිසුවා භාරදෙන බවත්, සිසුවාගේ භාරකරුවන්ට හැටන් පොලිසිය වෙත පැමිණෙන ලෙස ද දැනුම්දීමට කටයුතු කර තිබෙනවා.
