කැකිරාව හා ඒ අවට ප්රදේශවල තරුණයන් ඉලක්ක කරගනිමින් අයිස්, හෙරොයින් හා මත්කරල් අලෙවි කිරීමේ ජාවාරමක නිරත වූ 60 හැවිරිදි කාන්තාවක හා 18 හැවිරිදි තරුණයකු කැකිරාව – මල්දෙනිපුර ප්රදේශයේ දී පොලිස් අත්අඩංගුවට ගෙන තිබෙනවා.
දසත ප්රාදේශීය වාර්තාකරු පැවසුවේ, කාන්තාවක ඇතුළු පිරිසක් මත්ද්රව්ය ජාවාරමක් සිදු කරන බවට කැකිරාව පොලිස් ස්ථානයට ලද තොරතුරක් අනුව සිදුකළ ක්ෂණික මෙහෙයුමක දී සැකකරුවන් අත්අඩංගුවට ගැනීමට පොලිසියට හැකි වූ බවයි.
මල්දෙනිපුර ප්රදේශයේ නිවසක් වටලා එම නිවස තුළ දී අදාළ සැකකාරිය හා සැකකාර තරුණයා සමඟ අයිස් හා හෙරොයින් මත්කුඩු තොගයක් අලෙවිය සඳහා සූදානම් කරමින් සිටියදී අත්අඩංගුවට ගැනීම සිදු කෙරුණා.
පොලිසිය අදාළ නිවස වටලන අවස්ථාවේ දී එහි සිටි තවත් තරුණ සැකකරුවෙකු පලා ගොස් ඇති අතර එලෙස පලා ගොස් ඇත්තේ පොලිස් අත්අඩංගුවට පත් සැකකාරියගේ පුත්රයා බවට ද පොලිසිය හඳුනාගෙන තිබෙනවා.
ඒ අනුව, පොලිසිය තවදුරටත් එම නිවස පරික්ෂා කිරීමේ දී එම නිවසේ කාමරයක් තුළ සූක්ෂ්මව සඟවා තිබූ තවත් මත්කරල් 500ක් ද සොයා ගැනීමට හැකි වුණා.
ඒ අනුව එම සැකකරුවන් සන්තකයේ තිබී අයිස් මත්ද්රව්ය මිලිග්රෑම් 4350ක් ද, හෙරොයින් මිලිග්රෑම් 5150ක් ද, මත්කරල් 600ක් ද පොලිස් භාරයට ගැනුණු බවත් වාර්තාකරු පැවසුවා.
අයිස් හා හෙරොයින් මෙන්ම මත්කරල් ජාවාරම සම්බන්ධයෙන් පොලිස් අත්අඩංගුවට පත් සැකකාර කාන්තාව කැකිරාව ප්රදේශයේ ප්රසිද්ධ පාසැලක ආපණශාලාවක සේවිකාවක වශයෙන් ද කටයුතු කරමින් සිට ඇති බවට පොලිසිය තොරතුරු අනාවරණය කරගෙන තිබෙනවා.
පලාගිය සැකකාරියගේ පුත්රයා අත්අඩංගුවට ගැනීමට මේ වනවිට විශේෂ මෙහෙයුමක් පොලිසිය ක්රියාත්මක කර ඇති බවත් සඳහන්.
මෙම මත්ද්රව්ය ජාවාරම සම්බන්ධයෙන් පොලිස් අත්අඩංගුවට පත් සැකකාර කාන්තාව හා තරුණයා කැකිරාව මහේස්ත්රාත් අධිකරණය හමුවට ඉදිරිපත් කිරීමට නියමිතයි.
