බීමතින් බස් රථයට ගොඩ වූ සිව්දෙනෙක් මහ මඟ ගිය දෙදෙනෙකුගේ ජීවිත අනතුරේ දමයි

මාතර සිට කොළඹ බලා ධාවනය වූ පුද්ගලික බස් රථයකට බීමතින් ගොඩවූ පුද්ගලයන් පිරිසක් වැලිගම, කප්පරතොට ප්‍රදේශයේ දී එහි රියදුරුට පහරදීමට උත්සාහ කර තිබෙනවා.

එම අවස්ථාවේ රියදුරුට බස් රථය පාලනය කර ගැනීමට නොහැකිව සිදු වූ අනතුරකින් මාර්ගයේ ගමන් ගත් පුද්ගලයෙක් ජීවිතක්ෂයට පත්ව ඇති බවයි වාර්තා වන්නේ.

එහිදී තවත් අයෙක් බරපතළ තුවාල ලබා මාතර මහ රෝහලට ඇතුළත් කර ඇති බව අප වාර්තාකරු සඳහන් කළා.

ඊයේ (16) රාත්‍රී 9.00ට පමණ මෙම අනතුර සිදුව ඇති අතර, අනතුරින් මියගොස් ඇත්තේ දෙවිනුවරප්‍රදේශයේ පදිංචි 47හැවිරිදි පුද්ගලයෙක් බවයි වාර්තා වුණේ.

අනතුරුන් තුවාල ලබා ඇත්තේ ජීවිතක්ෂයට පත්වූ පුද්ගලයාගේ 68 හැවිරිදි මව බවයි දැනගන්නට ලැබුණේ.

මාතර සිට කොළඹ බලා ධාවනය වූ මෙම බස් රථයට වැලිගම නගරයෙන් බීමතින් ගොඩවූ පුද්ගලයින් සිව්දෙනෙක් බස් රථයේ රියදුරු සමඟ බහින් බස් වීමක් ඇතිකර ගෙන තිබෙනවා.

එහිදී ඔවුන් රියදුරුට වැලිගම, කප්පරතොට පාලම අසලදී පහරදීමට උත්සාහ ගෙන ඇති බවයි වාර්තා වන්නේ.

එම අවස්ථාවේ දී රියදුරුට බස් රථය පාලනය කරගත නොහැකිව ධාවනය වී මාර්ගයේ ගමන් කරමින් සිටි මව සහ පුත්‍රයාගේ ගැටී මෙම අනතුර සිදුව තිබෙනවා.

ඔවුන් දෙදෙනා කප්පරතොට ප්‍රදේශයේ පැවැති මංගල්‍ය උත්සවයකට සහභාගීව යළි නිවස බලා පැමිණෙමින් සිටිය දී මම අනතුරට මුහුණ පා ඇති බව සඳහන්.

මෙම අනතුර සම්බන්ධයෙන් බස් රථයේ රියදුරු සහ බීමතින් පැමිණ බස් රථයේ රියදුරුට පහර දුන් සිව්දෙනාගෙන් අයෙක් අත්අඩංගුවට ගෙන තිබෙනවා.

පහරදීමට සම්බන්ධ අනෙක් තිදෙනා අත්අඩංගුවට ගැනීමට පොලිස් කණ්ඩායමක් යොදවා ඇති බවයි වාර්තා වුණේ.