බිරිඳ මැරූ සැමියා පොලිසියට ඇවිත් භාරවෙලා (ඡායාරූප)

නිවසේ නිදාගෙන සිටි බිරිඳව පිහියකින් පහර දී ඝාතනය කළ සැමියෙක් අද (04) උදෑසන නාවලපිටිය පොලිසියට පැමිණ භාර වී තිබෙනවා.

මෙලෙස ඝාතනය ලක්ව ඇත්තේ නාවලපිටිය, සෙම්රොක් ප්‍රදේශයේ පදිංචිව සිටි ගයානි දිල්රුක්ෂි කුමාරි නැමැති (46) හැවිරිදි තිදරු මවක්.

කොළඹ ප්‍රදේශයේ ඇගළුම් කර්මාන්ත ශාලාවක සේවයේ නිරතව ඇති එම කාන්තාව, දානමය පිංකමක් සඳහා සහභාගීවීමට ඊයේ (03) නාවලපිටිය ප්‍රදේශයට පිහිටි දියණියගේ නිවසට පැමිණ එහි නතර වී තිබෙනවා.

එම කාන්තාව නිවසේ නිදා සිටිය දී අද (01) අලුයම් කාලයේ පිහියක් ද සමඟ හොර රහසේ එම නිවසට ඇතුළු වූ සැමියා විසින් ඇයට පිහි ප්‍රහාරයක් එල්ල කර ඇති බවයි වාර්තා වුණේ.

එම අවස්ථාවේ දී පිහි ප්‍රහාරයෙන් බේරීම සඳහා කාන්තාව නිවසින් පිටතට දිවගොස් තිබූ අතර, ඇය පසුපස හඹා ගිය සැමියා නිවසින් පිටතදීත් යළිත් ඇයට පිහියෙන් ඇණ ගලකින් හිසට පහර දී ඝාතනය කර ඇති බවයි අනාවරණය වී ඇත්තේ.

මෙම අවස්ථාවේ මව බේරීමට ගිය දියණියට ද තුවාල සිදුව ඇති අතර, ඝාතනයට ලක් වූ කාන්තාව සහ සැමියා අතර නිරන්තරයෙන් ගැටුම් ඇතිවීම හේතුවෙන් දෙදෙනා කාලයක සිට වෙන්ව ජීවත්ව ඇති බවයි පොලිසිය සඳහන් කළේ.

සිදුකරන ලද මූලික විමර්ෂණවල දී අනාවරණය වී ඇත්තේ පවුල් ආරවුලක් මත මෙම අපරාධය සිදුකර ඇති බවයි.

නාවලපිටිය මහේස්ත්‍රාත්වරයාගේ ස්ථාන පරීක්ෂාවෙන් පසු සිරුර පශ්චාත් මරණ පරීක්ෂණ සඳහා නාවලපිටිය දිස්ත්‍රික් මහ රෝහලේ අධිකරණ වෛද්‍යවරයා වෙත යොමුකර තිබෙනවා.