තැනැත්තන් වෙළෙඳාම මැඩලීම පිළිබඳ බිම්ස්ටෙක් සංවිධානයේ උප සමුහයේ දෙවන සමුළුව රැස්ව තිබෙනවා.
ශ්රී ලංකාවේ සංවිධායකත්වයෙන් ජුනි මස 26 -27 දෙදින තුළ කොළඹ දී මෙය පැවැත්වූ බවයි මාධ්ය නිවේදනයේ දැක්වෙන්නේ.
ජාතික බුද්ධි ප්රධානී සහ ශ්රී ලංකාවේ තැනැත්තන් වෙළෙඳාමට එරෙහි ව ජාතික කාර්ය සාධක බලකායේ නිල කමිටුවේ ප්රධානී මේජර් ජෙනරල් රුවන් කුලතුංග විසින් ප්රධාන දේශනය පවත්වන ලද අතර, ඉන් අනතුරුව බිම්ස්ටෙක් සංවිධානයේ ආරක්ෂක අංශ ප්රධානී MD Mosharaf Hossain විසින් විශේෂ ප්රකාශයක් කරනු ලැබුවා.
සංක්රමණය සඳහා වන ජාත්යන්තර සංවිධානයේ ආසියා සහ ශාන්තිකර කලාපීය අධ්යක්ෂවරිය වන Sarah Lou Arriola මෙනෙවිය ද මෙහිදී සිය අදහස් ප්රකාශ කළා.
මෙහිදී බිම්ස්ටෙක් සංවිධානයේ සාමාජික රටවල් වන බංග්ලාදේශය, භූතානය, ඉන්දියාව, මියන්මාරය, නේපාලය, ශ්රී ලංකාව සහ තායිලන්තය යන රටවල නියෝජිත නිලධාරීන් බෙංගාල බොක්ක ආශ්රිත කලාපයේ තැනැත්තන් වෙළෙඳාම හා අනෙකුත් මිනිස් ජාවාරම් සම්බන්ධ අපරාධ වැළැක්වීම සඳහා ඔවුන්ගේ රටවල් මගින් ගෙනයනු ලබන ක්රියාමාර්ග හා නීති පද්ධතිය පිළිබඳ ව කරුණු ඉදිරිපත් කර තිබෙනවා.
සමුළුව අතරතුර දී බිම්ස්ටෙක්හි සාමාජික රටවල නියෝජිතයන් විසින් බෙංගාල බොක්ක ආශ්රිත කලාපයේ තැනැත්තන් වෙළඳාම මැඩලීම වෙනුවෙන් පොදු සැලැස්මක් ඇති කිරීමේ අවශ්යතාව පිළිබඳ ව ද සාකච්ජා කළ අතර, එමගින් බිම්ස්ටෙක්හි පාර්ශ්වකරුවන් අතර ඇති වන ඵලදායිතාව හා අන්යෝන්ය සහයෝගීතාව ද අවධාරණය කරනු ලැබුවා.
ශ්රී ලංකාව නියෝජනය කරමින් ශ්රී ලංකා තැනැත්තන් වෙළෙඳාමට එරෙහි ජාතික කාර්ය සාධක බලකායේ නිලධාරීන් පිරිසක් මෙම අවස්ථාවට එක් ව සිටි බවයි වාර්තා වන්නේ.
