පෙර රජය යටතේ මත්පැන් බලපත්‍ර ලබාදුන්නේ ජාත්‍යන්තර මූල්‍ය අරමුදලට අනුව බදු ආදායම ලබා ගැනීමට බව හිටපු අමාත්‍ය මන්ත්‍රී දිලුම් අමුණුගම මහතා පවසනවා.
සර්වජන බලය පක්ෂයේ ජාතික සංවිධායකවරයා වශයෙන් කටයුතු කරන දිලුම් අමුණුගම මේ බව කියා සිටියේ අද (06) පෙරවරුවේ සර්වජන බල කාර්‍යාලයේ දී පැවති මාධ්‍ය හමුවකට එක්වෙමින්.
තමන් කිසිවිටෙක මත්පැන් බලපත්‍ර ලබා ගෙන නොමැති බව ද හිටපු අමාත්‍යවරයා කියා සිටියා.
මත්පැන් බලපත්‍ර ලබා දී ඇත්තේ බදු ආදායම සෙවීම පිණිස බවත්; පෙර රජය එම බලපත්‍ර හිතවත්කම්වලට ලබා දුන්නේ දැයි තමන් නොදන්නා බවත් හෙතෙම පැවසුවා.
එම ක්‍රියාවලිය ජාත්‍යන්තර අරමුදලේ යෝජනාවකට අනුව සිදු කළ බවත් හිටපු අමාත්‍ය අමුණුගම මහතා ප්‍රකාශ කළා.
සීනි කර්මාන්ත ශාලාවේ එතනෝල් නිරපරාදේ ඉවත දමන හෙයින් ඒ දිනවල තමන් යෝජනා කළේ එම එතනෝල් භාවිත කරන ස්කාගාරයක් තනන ලෙසට බවයි.
මේ දිනවල මත්පැන් බලපත්‍ර ලබාදීම සම්බන්ධයෙන් දැඩි ලෙස පාර්ලිමේන්තුවේ කතාබහක් නිර්මාණය වී ඇති පසුබිමක යි හිටපු අමාත්‍ය මේ බව කියා සිටියේ.
