බදු මුදල් නොගෙවා එය පැහැර හැරි පුද්ගලයින් සහ කල් ගිය බදු මුදල් අය කරගැනීම සම්බන්ධයෙන් මේ වනවිට (16) රජය සිය අවධානය යොමු කර ඇති බව මුදල් පිළිබඳ රාජ්‍ය අමාත්‍ය රංජිත් සියඹලාපිටිය පවසනවා.
මේ පිළිබඳ ව නව බදු අයකර ගැනීමට පූර්වයෙන් ක්‍රියාත්මක විය යුතු බවයි මුදල් රාජ්‍ය අමාත්‍යවරයා සඳහන් කළේ.
බදු මුදල් පිළිබඳ ව දැනට පවත්නා නීති යාවත්කාලීන කර, පැහැර හැර ඇති බදු මුදල් අය කරගැනීම සඳහා සුවිශේෂී වැඩපිළිවෙලක් දියත් කරන බව ද රාජ්‍ය අමාත්‍යවරයා කියා සිටියා.
යම් ආකාරයකින් තමන්ට බදු ගෙවීමේ අසීරුතාවක් ඇති නම්; ඒ පිළිබඳ ව අභියාචනා කිරීමට මෙන් ම ඒ පිළිබඳ ව නීති ආධාර ලබා ගැනීමට ද එම පුද්ගලයින්ට අවස්ථාවක් ඇති බවයි වාර්තා වන්නේ.
එමෙන්ම බදු ගෙවීමට යටත් වන්නේ මසකට රුපියල් ලක්ෂයකට වැඩි ශුද්ධ ආදායමක් ඇති අයෙක් පමණක් බවත්, ඔහු වෙනත් තැනකින් බදු ගෙවීමක් කර ඇත්නම් නැවත ඔහු බදු මුදල් නො ගෙවිය යුතු බවත් රාජ්‍ය අමාත්‍ය රංජිත් සියඹලාපිටිය වැඩිදුරටත් සඳහන් කළා.
