බංග්ලාදේශය තුළ දූෂිත පාලනයට එරෙහිව නැගි සිවිල් අරගල මර්දනයෙන් පුද්ගලයින් 1400ක් පමණ ජීවිතක්ෂයට පත් ව ඇති බව එක්සත් ජාතීන්ගේ මානව හිමිකම් කාර්යාලය නිවේදනය කරනවා.
CNN මාධ්ය වාර්තා කර ඇත්තේ 2024 අගෝස්තු මාසයේ දී තෙසතියක් පුරා පැවති ශිෂ්ය නායකයින්ගේ විරෝධතා මර්දනය කිරීමට බංග්ලාදේශ රජය ගත් විධිවිධාන මානව වර්ගයාට එරෙහිව ගත් අපරාධවලට සමාන විය හැකි බවත් අයිතිවාසිකම් උල්ලංඝනය කිරීම්වල එක් ස්වරූපයක් විය හැකි බවයි.
ජූලි මස 15 වැනිදා සිට අගෝස්තු මස 05 දක්වා කාලය බංග්ලාදේශයේ භීෂණමකාරී අවධියක් වූ අතර අගමැතිනි ෂීක් හසීනා ඉන්දියාවට පලා යාම ද සිදු වුණා.
ජිනීවා නිකුත් කළ නිවේදනයේ දැක්වෙන්නේ විරෝධතාවලට පෙර සහ ඉන්පසු සති කිහිපය තුළ ආරක්ෂක අංශ තැබූ වෙඩි ප්රහාර හේතුවෙන් බහුතරයක් තුවාල ලැබූ බවයි.
CNN මාධ්ය වාර්තා කරන පරිදි 11,700කට අධික පිරිසක් තවමත් රඳවාගෙන සිටින බව ද මියගිය බවට ඇස්තමේන්තු කර ඇති පුද්ගලයින්ගෙන් 12% සිට 13% දක්වා නැතහොත් 180ක් පමණ ළමයින් බවට ද හෙළි ව තිබෙනවා.
සමහර අවස්ථාවලදී බංග්ලාදේශ ආරක්ෂක අංශ නිරායුද සිවිල් වැසියාට අමානුෂික අන්දමින් පහරදීම් සිදු කර ඇති බව ද එක්සත් ජාතීන්ගේ මානව හිමිකම් කවුන්සිලය නිකුත් කළ නිවේදනයේ දැක්වෙනවා.
එක්සත් ජාතීන්ගේ මානව හිමිකම් ප්රධානී වොල්කර් ටර්ක්, විරෝධතා මර්දනය කිරීමේ මාර්ගයක් ලෙස “නීති විරෝධී ඝාතන, පුළුල් අත්තනෝමතික අත්අඩංගුවට ගැනීම්, රඳවා තබා ගැනීම් සහ වධහිංසා පැමිණවීම්” දේශපාලන නායකත්වයේ සහ ඉහළ ආරක්ෂක නිලධාරීන්ගේ දැනුම හා සම්බන්ධීකරණය ඇතිව සිදු කළ බවටයි චෝදනා කර ඇත්තේ.
මේ පිළිබඳ ව සොයා බැලීමට බංග්ලාදේශයේ අන්තර්කාලීන නායක, නොබෙල් සාම ත්යාගලාභී මුහම්මද් යූනුස්ගේ ආරාධනයෙන් එක්සත් ජාතීන්ගේ විමර්ශන කණ්ඩායමක් බංග්ලාදේශයට ගොස් තිබෙනවා.
