ආදිවාසී උප නායක ගුණබන්ඩියලා ඇත්තන් ඇතුළු පවුලේ පිරිස ඡන්දය ප්රකාශ කිරීමෙන් වැළකී ආපසු හැරී ආ පුවතක් අද (14) පෙරවරුවේ වාර්තා වුණා.
ආදිවාසී උප නායකය ඇතුළු පිරිස අද (14) පෙරවරුවේ දඹාන කනිෂ්ඨ විද්යාලයේ ස්ථාපිත කර ඇති ඡන්ද මධ්යස්ථානය වෙත ඡන්දය ප්රකාශ කිරීම සඳහා ගොස් තිබෙනවා.
එම අවස්ථවේ ඔවුන්ගේ සංස්කෘතියේ අනන්යතාවය වන පොරව කරමත තබාගෙන පැමිණීම හේතුවෙන් ඔවුන්ට ඡන්දය භාවිත කිරීමට එම ඡන්ද මධ්යස්ථානය භාර නිලධාරියා වසර ලබා දී නැහැ.
ඒ, හේතුවෙන් ආදිවාසී උප නායක ගුණබන්ඩියලා ඇත්තන් ඇතුළු පිරිස ඡන්ද මධ්යස්ථානයෙන් පිටව ආපසු පැමිණ තිබෙනවා.
කෙසේ වෙතත් ආදිවාසී නායක ඌරුවරිගයේ වන්නිලා ඇත්තන් ද ඡන්දය ප්රකාශ කිරීම සඳහා එම ඡන්ද මධ්යස්ථානයට පැමිණ ඇත්තේ ඔවුන්ගේ සංස්කෘතියේ අනන්යතාවය වන පොරව කරමත තබාගෙනයි.
එහිදී වන්නිලා ඇත්තන්ට කිසිඳු ගැටළුවකින් තොරව ඡන්දය ප්රකාශ කිරීමට අවස්ථාව ලබා දී ඇති අතර, ඉන්පසු ආදිවාසී පරපුරේ අනෙක් පිරිසට ද කිසිඳු ගැටළුවකින් තොරව පොරවත් රැගෙන පැමිණ ඡන්දය ප්රකාශ කිරීමට අවස්ථාව සලසා දී තිබෙනවා.
කෙසේ වෙතත් ආදිවාසී උප නායකයා ඇතුළු පිරිස මුහුණ දුන් ගැටලුව සම්බන්ධයෙන් අදහස් දක්වමින් වන්නිලා ඇත්තන් පැවසුවේ ආදිවාසීන්ගේ අයිතිවාසිකම් හා ආදිවාසී සංස්කෘතිය පිළිබඳ නොදන්නා මෙවන් නිලධාරීන් මෙවැනි සංස්කෘතියක් පවතින ගම්වල ඡන්ද මධ්යස්ථානවල ඡජන්ද රාජකාරී යොමු කිරීමෙන් වැළකී සිටින ලෙසයි.
