රුපියල් ලක්ෂ 20ක කප්පම් මුදල් ඉල්ලා දුරකථනයෙන් තර්ජනය කිරීමකට සම්බන්ධ සැකකරුවෙකු නුගේගොඩ කොට්ඨාස අපරාධ විමර්ශන ඒකකය විසින් අත්අඩංගුවට ගෙන තිබෙනවා.
හෝමාගම දකුණු පිටිපන ප්‍රදේශයේ පදිංචි පෙර පාසල් ගුරුවරියකට සැකකරු දුරකතනය මගින් තර්ජනය කර රුපියල් ලක්ෂ 20ක් ඉල්ලා ඇති බවටයි පැමිණිල්ල ලැබී ඇත්තේ.
හෝමාගම පොලිසියට ලැබුණු අදාළ පැමිණිල්ල සම්බන්ධයෙන් නුගේගොඩ කොට්ඨාස භාර ජ්‍යෙෂ්ඨ පොලිස් අධිකාරීවරයාගේ උපදෙස් මත විමර්ශන ආරම්භ කර තිබුණා.
ඒ අනුව විමර්ශන නිලධාරීන් විසින් ඊයේ (10) හෝමාගම ප්‍රදේශයේදී උපක්‍රමශීලිව කප්පම්කරු කැඳවා මුදල් ලබාදෙන අවස්ථාවේදී අත්අඩංගුවට ගෙන තිබෙනවා.
51 හැවිරිදි සැකකරු දකුණු පිටිපන පදිංචිකරුවෙක් වන අතර 848E සුවපුබුදුගම වසමේ ග්‍රාම නිලධාරීවරයා බවටයි විමර්ශනවලදී හෙළිවී ඇත්තේ.
සැකකරු කප්පම් මුදල් ලබා ගැනීමට පැමිණි යතුරුපැදිය, පෙර පාසල් ගුරුවරියට තර්ජනය කිරීමට යොදාගත් දුරකථන දෙකක් සහ ග්‍රාම නිලධාරී හැඳුනුම්පත ද පොලිස් භාරයට ගෙන තිබෙනවා.
මෙවැනි කප්පම් ඉල්ලීම් කිහිපයක් පිළිබඳ තවත් පැමිණිලි ලැබී ඇති අතර එම පැමිණිලිවලට අදාළ කප්පම් ඉල්ලීම් මෙම සැකකරු විසින් සිදු කර ඇති බවටයි පොලිසිය සැක කරන්නේ.
සිද්ධිය සම්බන්ධයෙන් නුගේගොඩ කොට්ඨාස අපරාධ විමර්ශන අංශය වැඩිදුර විමර්ශන සිදු කරනවා.
