ඕමාන් වෙරළට ඔබ්බෙන් වූ ගැඹුරු මුහුදේ දී තෙල් රැගත් නෞකාවක් පෙරළීමෙන් සිදු වූ අනතුරින් මේ වනවිට (17) පුද්ගලයින් 09 දෙනෙකු බේරාගෙන තිබෙනවා.
විදෙස් මාධ්‍ය වාර්තා කළේ; MT Prestige Falcon නමැති මැරීන් ට්‍රැෆික් සමාගමට අයත් මෙම ඉන්ධන ප්‍රවාහනය කෙරෙන නෞකාව පෙරළීමෙන් පුද්ගලයින් 16 දෙනෙකු අතුරුදන් වූ බවයි.
එම අතුරුදන් වූවන් 16 දෙනාම අදාළ ඉන්ධන නෞකාවේ සේවය කළ කාර්යය මණ්ඩලය බවටත් තොරතුරු වාර්තා වුණා.
කෙසේවෙතත් ඕමාන් නාවික හමුදාව සහ සෙසු ආරක්ෂක අංශවල දැඩි මෙහෙයුමකින් අනතුරුව මෙම කාර්යය මණ්ඩලයේ සාමාජිකයින් 16 දෙනෙකුගෙන් 09 දෙනෙකු බේරා ගැනීමට හැකි ව ඇතැයි සඳහන්.
මෙම බේරාගත් සාමාජිකයින් 09 දෙනා අතර ශ්‍රී ලාංකිකයෙක් සහ ඉන්දියානුවන් 08 දෙනෙකු ද සිටිනවා.
MT Falcon Prestige නම් නෞකාව කොමරෝස් ධජය යටතේ සිය ගමන් කටයුතු සිදු කරන අතර එය ඕමානයේ Duqn වරාය නගරයට ආසන්නයේ Ras Madrakah සිට නාවික සැතපුම් 25ක් ගිනිකොන දෙසින් පෙරළී අනතුරට ලක් වුණා.
කෙසේවෙතත් මෙම අතුරුදන් වූ 16 දෙනාගෙන් 09 දෙනෙකු බේරා ගැනුණ ද, තවත් 07 දෙනෙකු සොයා විමර්ශන කටයුතු ක්‍රියාත්මක අතර; එම පිරිස අතර ද තවත් ලාංකිකයින් දෙදෙනකු සිටින බවටත් වාර්තා වනවා.
මෙම ඉන්ධන නෞකාවේ සිටි කාර්යය මණ්ඩල සාමාජිකයින් පිළිබඳ ව විස්තරයක් ද අදාළ සමාගම විසින් මාධ්‍යයට මුදා හැර තිබෙනවා.
