විධිමත් පරීක්ෂණයකට යටත් නොකොට මෙරට පුද්ගලික සමාගමක් විසින් නිෂ්පාදනය කරන ලද එන්නත් වර්ග 08 ක් ලියාපදිංචි කිරීමට ජාතික ඖෂධ නියාමන අධිකාරිය ගෙන තිබෙන තීරණය බල රහිත කරන ලෙස ඉල්ලා ගොනු කරන ලද පෙත්සමක් වැඩිදුර විභාගය සඳහා ලබන මස 23 වනදා කැඳවන ලෙස අභියාචනාධිකරණය නියම කළා.
සමාජ ක්‍රියාකාරිකයින් දෙදෙනකු වන ප්‍රණීතා. එන්. වර්ණකුලසූරිය සහ දෙව්ෂාන් .පී. බුද්දරගේ යන අය විසින්
මෙම පෙත්සම ඉදිරිපත් කර තිබෙනවා.
මෙම පෙත්සම අද (20) අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න ඉදිරියේ කැඳවනු ලැබුවා.
එහිදී පෙත්සම්කාර පාර්ශ්වයේ නීතිඥවරයා කියා සිටියේ ප්‍රශ්නගත අදාළ එන්නත් තවදුරටත් නිෂ්පාදනය වෙමින් පවතින බවත් එම නිසා මෙම පෙත්සම කඩිනමින් විභාගයට ගෙන ඒ සම්බන්ධයෙන් තීන්දුවක් ලබාදෙන ලෙසත් ඉල්ලා සිටියා.
එහෙත් වග උත්තරකරුවන් වෙනුවෙන් පෙනී සිටි නීතිඥවරු සඳහන් කළේ අදාළ ඖෂධය පිළිබඳ ව කිසිදු පැමිණිල්ලක් ලැබී නොමැති බවයි.
ඉන් අනතුරුව අදාළ පෙත්සම් පිළිබඳ වැඩිදුර විභාගය ලබන මස 23 වනදා කැඳවන ලෙසත් අධිකරණය නියම කළා.
පෙත්සම්රුවන් කියා සිටින්නේ ඖෂධයක් වෙළඳපොළට මුදා හැරීම සඳහා ලියාපදිංචි කිරීමට පෙර එය මාස හයක පරීක්ෂණ කාලයකට යටත් කෙරෙන බවයි.
එහෙත් වග උත්තරකාර යාඩින් ලැබොටරි පුද්ගලික සමාගම විසින් නිෂ්පාදනය කළ මොලය ආශ්‍රිත රෝග මෙන්ම නිර්වින්දන කටයුතු සඳහා යොදා ගන්නා එන්නත් වර්ග අටක් එම පරීක්ණ කාලයට යටත් නොකොට ජාතික ඖෂධ නියාමන අධිකාරිය විසින් ලියාපදිංචි කිරීම තුළින් මහජන සෞඛ්‍යයට හානිකර විය හැකි බවත් පෙත්සම්කරුවන් පෙන්වා දී තිබෙනවා.
එබැවින් අදාළ එන්නත් වර්ග වෙළඳපොළට මුදා හැරීම සඳහා ලියාපදිංචි කිරීමට ජාතික ඖෂධ නියාමන අධිකාරිය විසින් ගත් තීරණය බල රහිත කිරීමේ නියෝගයක් නිකුත් කරන ලෙස පෙත්සම්කරුවන් අභියාචනාධිකරණයෙන් ඉල්ලා තිබෙනවා.
