සහල් පිටරටින් ගෙන්වීමට අවශ්‍යතාවක් නොමැති බව කෘෂිකර්ම සහ වැවිලි කර්මාන්ත අමාත්‍ය මහින්ද අමරවීර පවසනවා.
අමාත්‍යවරයා පවසන්නේ රටට අවශ්‍ය සහල් ප්‍රමාණය රට තුළම නිෂ්පාදනය කිරීමට මේ වන විටත් කටයුතු කරමින් සිටින බවයි.
මේ අතර නියඟය හේතුවෙන් යල කන්නයේ සිදු වූ වගා හානි සඳහා වන්දි ගෙවීමට රජය රුපියල් කෝටි 100ක් වෙන් කර ඇති බව අමාත්‍යවරයා වැඩිදුරටත් පවසනවා.
ඉන් රුපියල් කෝටි 50ක් දැනටමත් වන්දි වශයෙන් පිරිනමා ඇති බවයි ඔහු සඳහන් කර සිටියේ.
ගෙවීමට ඉතිරිව ඇති වන්දි මුදල් ගොවිජන සංවර්ධන දෙපාර්තමේන්තුව විසින් කඩිනමින් ලබාදෙන බව ද අමාත්‍යවරයා සඳහන් කර සිටියා.
2023 වසරේ බලපෑ නියඟය හේතුවෙන් වී වගා බිම් අක්කර 65,000ක් හානියට පත් වූ අතර, ගොවීන් 61,000ක් පීඩාවට පත් වුණා.
මේ අතර පසුගිය සමයේ පැවති අධික වර්ෂාව හා ගංවතුර හේතුවෙන් මෙවර මහ කන්නයේ වී වගා කර තිබූ කුඹුරු අක්කර 61,000ක් පමණ හානියට පත්ව ඇති බව වාර්තා වනවා.
ඒ, අනුව හානියට පත් වූ කුඹුරුවල හානි තක්සේරු කිරීමේ කටයුතු වහාම අරඹන ලෙස කෘෂිකාර්මික හා ගොවිජන රක්ෂණ මණ්ඩලයට උපදෙස් ලබාදී ඇති බව කෘෂිකර්ම හා වැවිලි කර්මාන්ත අමාත්‍යාංශය සඳහන් කළා.
