2019 වසරේ පාස්කු ඉරු දින එල්ල වූ ත්රස්ත ප්රහාරය පිළිබඳ සිදු කරන විමර්ශන දේශපාලන ප්රතිවාදිතාවන් හෝ භූ-දේශපාලන න්යාය පත්ර වෙත යොමු නොකළ බව පාර්ලිමේන්තු මන්ත්රී නාමල් රාජපක්ෂ පවසනවා.
සිය X ගිණුමෙහි සටහනක් තබමින් මන්ත්රීවරයා සඳහන් කළේ වර්තමාන රජය බලයට පැමිණියේ පාස්කු ඉරු දින එල්ල වූ ත්රස්ත ප්රහාරයෙන් පීඩාවට පත් වූ වින්දිතයන්ට සහ ඔවුන්ගේ පවුල්වලට යුක්තිය ඉටු කරන බවට පොරොන්දු වෙමින් බවයි.
එහෙත් එම පරික්ෂණවල වර්තමාන ප්රගතිය අනුව එම පොරොන්දුව ඉටු කරන්නේද සහ විමර්ශනයේ විශ්වාසනීයත්වය රැකෙන්නේද යන්න පිළිබඳ බරපතළ ප්රශ්න මතුවන බවද ඔහු පවසනවා.
සාධාරණ, විනිවිදභාවයෙන් යුතු සහ පක්ෂපාතී නොවන විමර්ශනයකට තමා විරුද්ධ නොවන බවත්, එවැනි විශ්වාසනීය පරීක්ෂණයක් සඳහා තමා දැඩිව සහාය දක්වන බවත් මන්ත්රීවරයා සඳහන් කර තිබෙනවා.
“මෙම කුරිරු ත්රස්තවාදී ක්රියාව පිටුපස සිටින සැබෑ කුමන්ත්රණකරුවන් හඳුනාගෙන නීතිය අනුව දඬුවම් ලබාදිය යුතු බව අප දැඩිව විශ්වාස කරමු,” යැයිද ඔහු වැඩිදුරටත් පවසනවා.
මේ අතර, මේජර් ජෙනරල් සුරේෂ් සලේ මහතා අත්අඩංගුවට ගැනීම සම්බන්ධයෙන් අදහස් දක්වමින් නාමල් රාජපක්ෂ මහතා සඳහන් කළේ, ඔහු ශ්රී ලංකා රාජ්ය බුද්ධි සේවය හි සේවය කළ ගෞරවනීය හමුදා නිලධාරියෙක් බවයි.
රාජ්ය බුද්ධි සේවයේ හිටපු අධ්යක්ෂ සුරේෂ් සලේ මහතා දශක තුනකට ආසන්න කාලයක් පැවති ත්රස්තවාදය පරාජය කිරීම සඳහා ශ්රී ලංකාව ගෙන ගිය සටනේදී වැදගත් භූමිකාවක් ඉටු කළ බවයි.
ඔහුගේ ජාතික ආරක්ෂාවට කළ සේවය ප්රශංසනීය බව සඳහන් කළ මන්ත්රීවරයා, කෙසේ වෙතත් කාලයත් සමඟම ඔහු පාස්කු ප්රහාරවලට සම්බන්ධ කර පසුගිය කාලයේ ව්යාජ මතයන් සහ දේශපාලන බලපෑම් සහිත කතා නිර්මාණය වී ඇති බවද පවසනවා.
ඒ අතරතුර,අදාළ ප්රහාරය සම්බන්ධයෙන් වගකීම් පැහැර හැරි පුද්ගලයන්ට එම මට්ටමේම විමර්ශන සිදු වී නොමැති බවද ඔහු සඳහන් කළා.
තවද, නිල කොමිෂන් වාර්තා තුළ නොසැලකිල්ල පිළිබඳ සඳහන් වූ සමහර පුද්ගලයන් පසුව වර්තමාන රජය සමඟ එකතුවී ඇති අතර, ඔවුන්ට උසස් තනතුරු ලබා දී ඇති බවත්, ඔවුන් අතරේ සුරේෂ් සලේ මහතා පිළිබඳව පමණක් විශේෂයෙන් ඉලක්ක කරමින් විමර්ශන සඳහා යොමු කර ඇති බවත් ඔහු පවසනවා.
