බදුල්ල – රන්දෙණිගල ප්‍රධාන මාර්ගයේ රන්දෙණිගල ජලාශයට ඉහළින් පිහිටි විශාල රක්ෂිතයට කිසිවෙකු විසින් ගිනි තබා තිබෙනවා.
ඊයේ (27) රාත්‍රියේ මෙම ගින්න කිසියම් පුද්ගලයෙකු විසින් තබන්නට ඇතැයි සැක කරන බවටයි වාර්තා වන්නේ.
අද අලුයම වන විටත් ගින්න කඳුවැටිය ඉහළට පැතිර යමින් පැවතුණු බව අප ප්‍රාදේශීය වාර්තාකරු පවසනවා.
රන්දෙණිගල රක්ෂිතය හෙක්ටයාර 42,000ක පමණ භූමි ප්‍රදේශයකින් යුත් මෙරට විශාලතම රක්ෂිත කිහිපයෙන් එකක්.
ගහකොළවලින් මෙන් ම වනඅලි විශාල ප්‍රමාණයක් රක්ෂිතය සිය වාසස්ථානය කරගෙන ජීවත් වනවා.
රන්දෙණිගල, රන්ටැඹේ සහ වික්ටෝරියා ආදි ජලාශ පෝෂණය වන අතු ගංගා රැසක් ද මෙම කඳුවැටියෙන් ආරම්භ වනවා.
රක්ෂිතය තුළ ඇති අනාරක්ෂිත බව නිසා ගින්න නිවා දැමීමටත් කිසිවෙකු ඉදිරිපත් වී නොමැති බවයි පැවසෙන්නේ.
මේ ආකාරයට රක්ෂිතයට විවිධ පිරිස් මෙලෙස වරින් වර ගිනි තබන බවටයි රක්ෂිතය පාමුල පිහිටි ගම්මානවල ජනතාව චෝදනා කරන්නේ.
