සංචාරක අයර්ලන්ත කණ්ඩායම සහ ශ්රී ලංකා කණ්ඩායම අතර, තරග දෙකකින් සමන්විත ටෙස්ට් තරගාවලියේ පළමු ටෙස්ට් තරගය හෙට (16) ගාල්ල ජාත්යන්තර ක්රීඩාංගණයේදී ආරම්භ වීමට නියමිතව තිබෙනවා.
පළමු තරගයට පෙර ශ්රී ලංකා කණ්ඩායම සිය අවසන් පුහුණු සැසිය සඳහා ජාත්යන්තර ක්රීඩාංගණයේදී අද එක් වුණා.
හෙට ආරම්භවන පළමු ටෙස්ට් තරගයට සඳහා දඟ පන්දු යවන්නන් වන රමේෂ් මෙන්ඩිස් සහ ප්රභාත් ජයසූරියට වැඩි අවස්ථාවක් ලබාදීමට තීරණය කර ඇති බව ශ්රී ලංකා ටෙස්ට් නායක දිමුත් කරුණාරත්න සඳහන් කළා.
මාධ්ය වෙත අදහස් දක්වමින් දිමුත් වැඩිදුරටත් පැවසුවේ පිතිකරුවන් 07 දෙනෙක්, දඟ පන්දු යවන්නන් දෙදෙනෙක් සහ වේග පන්දු යවන්නන් දෙදෙනෙක් සමඟ පළමු තරගයට එක්වීමේ සැලසුමක් ඇති බවයි.
පවතින උණුසුම් කාලගුණයත් සමඟ එක් වේග පන්දුයවන්නෙක් අබාධයකට ලක්වුවහොත් වේගපන්දු යවන්නෙක් නැතිවීම හේතුවෙන් වේග පන්දු යවන්නන් දෙදෙනෙක් සමඟ තරගයට එක්වීමට තීරණය කළ බවයි දිමුත් පවසා සිටියේ.
මේ අතර නිශාන් මධුෂ්ක හෙට තරගයේ දී ආරම්භක පිතිකරුවා ලෙස කටයුතු කිරීමට නියමිත බවත්, කඩුල්ල පිටුපස වගකීම සධීර සමරවික්රමට පැවරෙන බවත් දිමුත් මෙහිදී වැඩිදුරටත් සඳහන්කර සිටියා.
