ශ්‍රී ලංකාව හා සංචාරක නවසීලන්තය අතර දෙවන එක්දින තරගය අද පස්වරුවේ පල්ලෙකැලේ ජාත්‍යන්තර ක්‍රිකට් ක්‍රීඩාංගණයේ දී ආරම්භ වුණා.
තරගයේ කාසිය වාසිය දිනූ ශ්‍රී ලංකා නායකයා පළමුව පන්දුවට පහරදීමට නවසීලන්තයට ආරාධනා කළ අතර, ක්‍රීඩාංගණයට වර්ෂාවෙන් බාධා එල්ලවීම හේතුවෙන් නවසීලන්ත ඉනිම අවස්ථා දෙකක දී තාවකාලිකව නවතා දමන්නට සිදු වුණා.
මේ හේතුවත් සමඟ එක් ඉනිමක් පන්දුවාර 47කට සීමා කිරීමටයි විනිසුරුවරුන් තීරණය කළේ.
ඒ, අනුව නවසීලන්තය පන්දුවාර 45යි පන්දු 01ක් තුළ සියල්ලන් දැවී ලකුණු 209ක් ලකුණු පුවරුවට එක් කළා.
ආරම්භයේ දී කඩා වැටුණු නවසීලන්ත ඉනිමට යම් ජීවයක් එක්කරන්නට මාර්ක් චැප්මන් කටයුතු කළ අතර එහිදී ඔහු ලකුණු 76ක් ලකුණු පුවරුවට එක් කළා.
නවසීලන්ත ඉනිමේ අවසානය දක්වා හුදෙකලා සටනක නිරත වූ මිචෙල් හේ ලකුණු 49ක් රැස් කිරීමට සමත් වුණා.
මෙම තරගයේ දී ශ්‍රී ලංකා පන්දු රැකීම උසස් මට්ටමක පැවති අතර, එහිදී අවිශ්ක ප්‍රනාන්දු සහ පැතුම් නිස්සංක ඉතා අපහසු උද පන්දු 04ක් රැක ගත්තා.
පන්දු යැවීමේ දී ජෙෆ්රි වැඩර්සේ කඩුලු 03ක් බිඳ දැමූ අතර, මහිෂ් තීක්ෂණ කඩුලු 03ක් සහ අසිත ප්‍රනාන්දු කඩුලු 02ක් බිඳ දැමුවා.
ඒ, අනුව මෙම තරගය ජයගැනීමට ශ්‍රී ලංකාවට පන්දුවාර 47ක් තුළ ලකුණු 210ක ඉලක්කයක් හිමිව තිබෙනවා.
