දැනට අස්වැසුම ප්‍රතිලාභ ලබමින් රජය නොමිලේ සහල් ලබාගැනීම සඳහා නොපැමිණි පිරිස සම්බන්ධයෙන් වාර්තාවක් කැඳවා ඇති බව මුදල් රාජ්‍ය අමාත්‍ය ශෙහාන් සේමසිංහ පවසනවා.
මුදල් අමාත්‍යාංශයේ සංවර්ධන මූල්‍ය දෙපාර්තමේන්තුව මඟින් අදාළ වාර්තාව සකස් කරමින් පවතින අතර, එම වාර්තාව ලබන සතිය වනවිට තමා වෙත ලැබීමට නියමිත බවයි රාජ්‍ය අමාත්‍යවරයා සඳහන් කළේ.
නොමිලේ සහල් ලබාදීම සිදු කළේ මෙරට වෙසෙන වඩාත් ම දිළිඳු පවුල් ඉලක්ක කරගෙන වන අතර, අස්වැසුම ප්‍රතිලාභීන්ට එය අනිවාර්යයෙන්ම හිමි වන බවයි ඔහු පැවසුවේ.
නමුත් අදාළ සහල් ලබාගැනීම සඳහා එම ස්ථානවල යාමේ අවශ්‍යතාව පවතින බැවින් කිසියම් පාර්ශ්වයක් වංචා සහගත ලෙස අස්වැසුම ලබාගන්නේ නම් සිය අනන්‍යතාව හෙළිවේ යැයි යන සැකය මත කිසිවකු එය ලබාගැනීමට ඉදිරිපත් නොවූවේ නම් එය හඳුනාගැනීම සඳහා මෙම වාර්තාව පහසුවක් වනු ඇති බවයි අමාත්‍යවරයා පවසා සිටියේ.
අස්වැසුම ප්‍රතිලාභ වැඩසටහන පිළිබඳ දිස්ත්‍රික් ලේකම්වරුන් දැනුම්වත් කිරීම සඳහා අද (14) දින කොළඹ පැවැති සම්මන්ත්‍රණයකට එක් වෙමින් අමාත්‍යවරයා මේ බව සඳහන් කළා.
මේ අතර අස්වැසුම දෙවැනි අදියර ආරම්භ කිරීම සඳහා දැනට අයදුම්පත් 450,404ක් ලැබී ඇති අතර, ඉන් 84% හෙවත් 377,485ක් පද්ධතියට ඇතුළත් කර ඇති බව මෙහි දී අනාවරණ වුණා.
රාජ්‍ය අමාත්‍යවරයා සඳහන් කළේ අලුතෙන් බඳවා ගත් ග්‍රාම නිලධාරීන් 2,000 මෙම කටයුත්ත වෙනුවෙන් උපරිමයෙන් දායක කරගන්නා බවයි.
එමෙන්ම අස්වැසුම සංගණන කටයුතු සඳහා දායකවන වෙනත් පාර්ශ්වයන් වෙත ද දීමනා ලබාදීමට පියවර ගන්නා බවත් ඊට අදාළ කැබිනට් පත්‍රිකාව ද කඩිනමින් අමාත්‍ය මණ්ඩලය හමුවට ඉදිරිපත් කිරීමට නියමිත බවත් අමාත්‍යවරයා වැඩිදුරටත් සඳහන් කළා.
