ජ්‍යේෂ්ඨ නියෝජ්‍ය පොලිස්පති නිලන්ත ජයවර්ධන වහාම ක්‍රියාත්මක වන පරිදි අනිවාර්යය නිවාඩු යවා තිබෙනවා.
ඊයේ (18) පස්වරුවේ මෙම නිවේදනය ශ්‍රී ලංකා පොලිස් කොමිෂන් සභාවෙන් සිදු කළා.
ජ්‍යේෂ්ඨ නියෝජ්‍ය පොලිස්පතිවරයාට මෙම තීරණය බලපානු ලබන්නේ 2019 වර්ෂයේ අප්‍රේල් මස 21 වැනි දින මෙරට ස්ථාන කිහිපයක් එල්ල කරගනිමින් සිදු වූ මරාගෙන මැරෙන පාස්කු ඉරුදින ත්‍රස්ත ප්‍රහාරය හේතුවෙන්.
පොලිස් කොමිෂන් සභාව නිවේදනය කළේ පාස්කු ප්‍රහාරය සිදුවීම සම්බන්ධ ව එවක රාජකාරි කටයුතු කළ නිලන්ත ජයවර්ධනට එරෙහිව පැවැත්වෙන විනය පරීක්ෂණ අවසන් වන තුරු ඔහුව අනිවාර්යය නිවාඩු යැවීමට කටයුතු කළ බවයි.
පාස්කු ප්‍රහාරය සිදුවන කාල වකවානුවේ දී නිලන්ත ජයවර්ධන මහතා මෙරට රාජ්‍ය බුද්ධි අංශයේ අධ්‍යක්ෂවරයා ලෙස කටයුතු කළා.
මීට වසර 05කට පෙර අප්‍රේල් මස 21 වැනි දින ස්ථාන පහක් එල්ල කරගනිමින් සහරාන් හෂීම් ඇතුළු අන්තවාදීන් විසින් එල්ල කරන ලද මරාගෙන මැරෙන ත්‍රස්ත ප්‍රහාරය පිළිබඳ ව ලැබුණු බුද්ධි තොරතුරු එවක සිටි පොලිස්පති පූජිත් ජයසුන්දර හට ලබා දීමට කටයුතු නොකළ බවයි 2021 නොවැම්බර් මස 30 වැනි දින කොළඹ ත්‍රිපුද්ගල මහාධිකරණ විනිසුරු මඬුල්ල හමුවේ හෙතෙම ප්‍රකාශ කළේ.
එවකට රාජ්‍ය බුද්ධි අංශයේ අධ්‍යක්ෂවරයා සේ ම මධ්‍යම පළාත් භාර ජ්‍යෙෂ්ඨ නියෝජ්‍ය පොලිස්පතිවරයා වශයෙන් ද නිලන්ත ජයවර්ධන මහතා රාජකාරි කරනු ලැබුවා.
ප්‍රහාරය සිදු වන අවස්ථාවේ විදේශගත වී සිටි එවකට ජනාධිපතිවරයා ලෙස කටයුතු කළ මෛත්‍රීපාල සිරිසේන මහතාට හෝ අගමැතිවරයාට හා රාජ්‍ය ආරක්‍ෂක අමාත්‍යවරයා ලෙස කටයුතු කළ රනිල් වික්‍රමසිංහ, රුවන් විජේවර්ධන යන මහත්වරුන් ඇතුළු දේශපාලන අධිකාරියට එය බුද්ධි තොරතුරක් ලෙසින් ලබාදීමක් සිදු නොකිරීම සම්බන්ධයෙන් වගකීම් විරහිත ලෙස සිය සේවය පැහැර හැරීම යන චෝදනාව ද නිලන්ත ජයවර්ධන හට එල්ල වී තිබෙනවා.
2019 අප්‍රේල් මස 04 වැනි දින රාජ්‍ය බුද්ධි අංශයට විදේශීය බුද්ධි අංශවලින් මෙවැනි ප්‍රහාරයක් සම්බන්ධයෙන් තොරතුරක් ලැබුණ ද එය නිශ්චිත බුද්ධි තොරතුරක් දැයි හරියටම අප්‍රේල් මස 21 වැනි දින තෙක් තහවුරු කර ගැනීමට නොහැකි වූ බවයි නිලන්ත ජයවර්ධන මහතා එවක උසාවියේ දී නීතිඥවරු එල්ල කළ හරස් ප්‍රශ්නවලට පිළිතුරු ලබා දුන්නේ.
මෙවන් පසුබිමක් තුළ ශ්‍රී ලංකා පොලිස් කොමිෂන් සභාව නිවේදනය කරනු ලැබුවේ; ජ්‍යේෂ්ඨ නියෝජ්‍ය පොලිස්පතිවරයාට එරෙහිව විනය පරීක්ෂණයක් සිදු කෙරෙන අතර එය නිසි ලෙස අවසන් වන තුරු ඔහුව රාජකාරියෙන් අනිවාර්යය නිවාඩු යැවීමටයි.
