නාවික හමුදාධිපති වයිස් අද්මිරාල් ප්‍රියන්ත පෙරේරා මහතා ඊයේ (02) ශ්‍රී ජයවර්ධනපුර කෝට්ටේ ආරක්ෂක මූලස්ථාන සංකීර්ණයේ පිහිටි ආරක්ෂක අමාත්‍යාංශ ලේකම් කාර්යාලයේ දී, ආරක්ෂක අමාත්‍යාංශයේ අභිනව ලේකම්වරයා වශයෙන් කටයුතු කරනු ලබන, එයාර් වයිස් මාර්ෂල් සම්පත් තුයියකොන්තා (විශ්‍රාමික) සමග නිල හමුවක් සිදු කෙරුණා.
නාවික හමුදා මාධ්‍ය අංශය නිවේදනය කළේ; හමුදාමය සම්ප්‍රදායන්ට අනුකූලව සිදු කෙරුණු මෙම ප්‍රථම නිල හමුවේ දී, ආරක්ෂක අමාත්‍යාංශයේ අභිනව ලේකම්වරයා වශයෙන් පත්වීම සම්බන්ධයෙන් එයාර් වයිස් මාර්ෂල් සම්පත් තුයියකොන්තා (විශ්‍රාමික) වෙත වයිස් අද්මිරාල් ප්‍රියන්ත පෙරේරා විසින් සිය සුබ පැතුම් එක් කෙරුණු බවයි.
ජාතික ආරක්‍ෂාව සම්බන්ධයෙන් නාවික හමුදාවේ කාර්යභාරය ඇතුළු වැදගත් කරුණු පිළිබඳ නාවික හමුදාධිපති සහ අභිනව ආරක්ෂක ලේකම්වරයා අතර සුහද අදහස් හුවමාරුවක් ද සිදු කෙරුණා.
මෙම ප්‍රථම නිල හමුව සංකේතවත් කරමින් දෙපාර්ශ්වය අතර සමරු තිළිණ හුවමාරුවක් ද සිදු කෙරුණු බවයි නාවික හමුදා මාධ්‍ය අංශය නිවේදනය කළේ.
