පාර්ලිමේන්තු මහ මැතිවරණයේ නාම යෝජනා භාර ගැනීමේ කටයුතු අද (04) පෙරවරුවේ සිට ආරම්භ වුණා.
මැතිවරණ කොමිෂන් සභාවේ කොමසාරිස් ජනරාල් සමන් ශ්‍රී රත්නායක මහතා පැවසුවේ; අද උදෑසන සිට දිස්ත්‍රික්ක 22ක් පදනම් කරගනිමින් තේරීම් භාර නිලධාරීන්ගේ අධීක්ෂණය යටතේ නාම යෝජනා භාර ගැනීමේ කටයුතු ආරම්භ වූ බවයි.
අද සිට එළඹෙන 11 වැනිදා දහවල් 12 තෙක් මෙම නාමයෝජනා රාජකාරි වේලාවන් තුළ දී භාරගන්නා බවයි පැවසෙන්නේ.
එමෙන්ම සෙනසුරාදා සහ ඉරිදා දිනයන්වල දී නාම යෝජනා භාරගැනීම් කටයුතු සිදු කෙරෙන්නේ නැහැ.
මේ අතර දේශපාලන පක්ෂ ඇප මුදල් තැන්පත් කිරීම අවශ්‍ය නොවන බවත්; ස්වාධීන අපේක්ෂකයින් ඉදිරිපත් වන සංඛ්‍යාවට සාපේක්ෂව එක් අපේක්ෂකයෙකුගෙන් රුපියල් 2000ක් බැගින් ඇප මුදල් තැන්පත් කළ යුතු ව තිබෙනවා.
මෙම ඇප මුදල් තැන්පත් කිරීම ඔක්තෝබර් 11 වැනි දින දහවල් 12න් අවසන් වනු ඇති.
එමෙන්ම මැතිවරණ කොමිෂන් සභාව ඉල්ලා සිටින්නේ ප්‍රමාදයකින් තොරව අදාළ ඇප මුදල් සහ නාමයෝජනා පත්‍රවල සියලුම ලියකියවිලි දිස්ත්‍රික් ලේකම් කාර්‍යාල වෙත ලබාදීමට කටයුතු කරන ලෙසයි.
