අශෝක රංවල ඉල්ලා අස්වීමෙන් පුරප්පාඩු වූ කතානායක ධුරය සඳහා එළඹෙන 17 වැනිදා පැවැත්වෙන පාර්ලිමේන්තු සභාවාරයේ දී මන්ත්‍රිවරයෙකු තෝරා පත් කර ගන්නා බව පාර්ලිමේන්තුව පවසනවා.
එදිනට නියෝජ්‍ය කථානායවරයා ඉදිරියේ දී ජාතික ලැයිස්තු මන්ත්‍රිවරුන් දිවුරුම් දීමෙන් අනතුරුව කතානායකවරයා තෝරා පත්කරගන්නා බවයි පාර්ලිමේන්තුව වැඩිදුරටත් සඳහන් කළේ.
අනතුරුව ධුරයෙන් ඉල්ලා අස් වූ හිටපු කතානායක අශෝක රංවල විසින්; ජනාධිපතිවරයා වෙත යවන යොමුකළ ලිපිය පාර්ලිමේන්තු මහ ලේකම්වරිය සභාවට ඉදිරිපත් කිරීමට නියමිතයි.
මේ අතර හිටපු කතානායක අශෝක රංවල විසින් ජනාධිපතිවරයාට යොමුකළ ජනාධිපතිවරයා වෙත ලැබුණු බවත් එය ජනධිපතිවරයා විසින් පිළිගෙන ඇති බවත් ජනාධිපති ලේකම්වරයා පාර්ලිමේන්තු මහ ලේකම්වරියට දැනුම් දී තිබෙනවා.
ආණ්ඩුක්‍රම ව්‍යවස්ථාවේ 64(2) ව්‍යවස්ථාව අනුව කතානායක, නියෝජ්‍ය කතානායක හෝ නියෝජ්‍ය කාරක සභා සභාපති යන කවර පදවියකින් හෝ ඉල්ලා අස් වන්නේ නම් ඒ බව ස්වකීය අත්සන යටතේ වූ ලිපියක් මගින් ජනාධිපතිවරයාට දැනුම්දිය යුතු වනවා.
