නගර ශාලාවේ ඉහල පෙලේ මඟුල් ගෙදර ඉතුරු කෑම කන්න ආ දරුවන් පහක් දණ ගස්වයි

පසුගියදා වැලිගම නගර ශාලාවේ පැවති මංගල්‍යය උත්සවයක් අතරතුර පාසල් සිසුන් පස් දෙනකු ආරාධනයකින් තොරව එහි ගොස් ආහාර ගැනීමට උත්සාහ කළ බව කියමින් එම පාසල් සිසුන් පස් දෙනා එහි සේවකයන් විසින් අල්ලා දණගස්වා පොලීසිය වෙත බාර දීමේ පුවතක් වාර්තා වනවා.

අවුරුදු 12,13,16,17 වයසේ පසුවන සිසුන් පස් දෙනකු මෙලෙස මෙම සේවකයන් විසින් පොලීසිය වෙත බාරදී තිබෙනවා. මෙහිදි පොලීසිය පැමිණ වැලිගම පොලීසිය වෙත කැදවා ගෙන ගොස් පැය කිහිපයක් රදවාගෙන සිට පසු මුදා හළ තිබේ.

මේ පිළිබඳව වැලිගම නගරාධිපතිනී යමුනා කාන්ති මහත්මියගෙන් විමසූ විට ඇය පැවසුවේ අදාල පිරිස ළමුන් නොව කෑම බලහත්කාරයෙන් මංකොල්ලකෑම සඳහා පැමිණි පිරිසක් බවයි. කෙසේ වෙතත් ඇය පැවසුවේ ඔවූන් දනගැස්වීමක් සිදු නොකල බවයි.

මෙම සිද්ධියට මුහුණ දුන් සිසුවකු අදහස් දක්වමින් පැවසුවේ

“එම විවාහ මංගල්‍යයවලට විශාල පිරිසකට උයනවා. එතැන ඉතිරි වන කෑම කන්න අපි මීට පෙරත් ගිහින් තියෙනවා. කෑම උයන අංකල් කෙනෙක් තමයි අපිට කාලා යන්න එන්න කීවේ.ඒ අනුව අපි පස් දෙනා ගියාම එතන හිටපු කෙනෙක් පොඩ්ඩක් ඉන්න කීවා. ඒ අතරතුර දී නගරාධිපතිතුමිය හා තවත් කිහිප දෙනකු ඇවිත් අපිට බැනලා පඩි පෙළ ළඟ දණ ගහ ගෙන ඉන්න කීවා.විශාල පිරිසක් හිටපු නිසා අපිට ඒ වෙලාවේ ලොකු ලැජ්ජාවක් ඇති වූණා.ටීක වේලාවකට පසු පොලීසිය පැමිණ අපිව රැගෙන ගියා. එහෙදිත් බැනලා පැය තුනකට පසුව අපි අම්මලා තාත්තලාට භාර දුන්නා.”