කලාවැව ජාතික උද්යානය තුළ පිහිටි කලාවැවේ ජල මට්ටම ඉතා ඉහළ මට්ටමක පවතිද්දී කලාවැව තරණය කිරීමට ගිය දෙනෙත් අන්ධ වනඅලියකු කලාවැව් දිය මත දී යා යුතු මග සොයාගත නොහැකි ව අතරමං ව සිටියදී බේරාගෙන; ගොඩට පන්නා දැමීමට ගල්කිරියාගම වනසත්ත්ව අඩවි ආරක්ෂක කාර්යාලයේ නිලධාරීන් කටයුතු කර තිබෙනවා.
අප ප්රාදේශීය වාර්තාකරු පැවසුවේ; මේ වනවිට කලාවැවේ ජල මට්ටම අක්කර අඩි 86,000ක් පමණ දක්වා ඉහළ ගොස් ඇති බවයි.
ඒ අනුව මේ දිනවල කලාවැව වාන් දමමින් පවතින අතර එහි හදිසි වාන් දොරටු ද විවෘත කර තිබෙනවා.
මෙම දෙනෙත් අන්ධ වනඅලියා කලාවැව තරණය කිරීමට ගොස් ඇත්තේ මෙවන් තත්ත්වයක් එම ජලාශයේ පවතින පසුබිමකදීයි.
කලාවැව් දියේ අතරමංව සිටි එම වනඅලියා සම්බන්ධයෙන් ප්රදේශවාසීන් කළ දැනුම්දීමක් අනුව එම වනඅලියාගේ දිවි බේරා ගැනීමේ මෙහෙයුම් ක්රියාත්මක කිරීමට ගල්කිරියාගම වනසත්ත්ව අඩවි ආරක්ෂක කාර්යාලයේ නිලධාරීන් යුහුසුළුව කටයුතු කරනු ලැබුවා.
ඔරු කිහිපයක් ආධාරයෙන් සිදුකළ එම මෙහෙයුම දැක බලා ගැනීමට ද කලාවැව අවට ප්රදේශවාසීන් පිරිසක් ද එක්රොක්ව සිටි බවයි අප ප්රාදේශීය වාර්තාකරු පැවසුවේ.
කලාවැව වැව් රක්ෂිතයේ සිට පැමිණ ඇති දෙනෙත් අන්ධ මෙම වනඅලියා කලාවැව තරණය කිරීමට යාමේ දී කලාවැව කවටයාවැව ප්රදේශයේ දී මෙලෙස ගැඹුරු වැව් දිය මත දී අතරමංව තිබෙනවා.
ධීවරයින්ගේ ද සහාය ඇතිව වනජීවී නිලධාරීන් අලියා නිරුපද්රිත ව ගොඩට පන්නා දැමීමට කටයුතු කළ අතර ඒ සඳහා පැය දෙකක පමණ කාලයක් ගත වූ බවයි වාර්තා වන්නේ.
වනජීවී නිලධාරීන් සිදු කළ එම මෙහෙයුම හේතුවෙන් දියේ ගිලීමෙන් මියයාමට ඉඩක් තිබූ එම අන්ධ වනඅලියාගේ ජීවිතය බේරාගන්නටයි හැකි ව ඇත්තේ.
මෙහෙයුමේ දී නිරුපද්රිතව ගොඩට ගත් එම දෙනෙත් අන්ධ වනඅලියා යළි කලාවැව රක්ෂියට ආරක්ෂිත ව පලවා හැරීමට වනජීවී නිලධාරීන් කටයුතු කළා.
