ශ්රී ලංකාවට ගිනිකොන දෙසින් බෙංගාල බොක්කෙහි පවතින ගැඹුරු පීඩන අවපාතය අද (08) පස්වරු 02.00 වන විට පොතුවිල් සිට කිලෝමීටර් 250 ක් පමණ ගිනිකොන දෙසින් පිහිටා තිබුණු බව කාලගුණ විද්යා දෙපාර්තමේන්තුව පස්වරුවේ නිකුත් කළ නිවේදනයේ සඳහන් වුණා.
නිරිත දිග බෙංගාල බොක්ක හරහා බටහිරට බරව වයඹ දෙසට ගමන් කර 2026 ජනවාරි 09 වන දින පස්වරු 5.30 සිට රාත්රී 11.30 දක්වා කාලය තුළ හම්බන්තොට සහ කල්මුණේ අතර ශ්රී ලංකා වෙරළ තීරය හරහා ගමන් කිරීමට බොහෝ දුරට ඉඩ ඇති බවයි එම නිවේදනයේ සඳහන් වුණේ.
දිවයිනේ බොහෝ ප්රදේශවල අහස වලාකුළින් බරව පවතින බවත් කාලගුණ විද්යා දෙපාර්තමේන්තුව විසින් නිකුත් කළ නිවේදනයේ සඳහන්.
උතුරු, උතුරු-මැද, නැගෙනහිර, ඌව, මධ්යම, වයඹ සහ දකුණු පළාත්වල විටින් විට වැසි හෝ ගිගුරුම් සහිතවැසි ඇති වේ.
සෙසු ප්රදේශ වල තැනින් තැන වැසි හෝ ගිගුරුම් සහිත වැසි ඇති විය හැකි බවද කලගුනා විද්යා දෙපාර්තමේන්තුව විසින් පෙන්වා දෙනවා.
නැගෙනහිර පළාතේත් මුලතිව්, වව්නියාව, කිලිනොච්චිය, පොලොන්නරුව දිස්ත්රික්කවලත් ඇතැම් ස්ථානවලට මිලි මීටර් 150 ට වැඩි ඉතා තද වැසි ඇති විය හැකි අතර ඌව පළාතේත් නුවරඑළිය, මාතලේ සහ මන්නාරම දිස්ත්රික්කවලත් ඇතැම් ස්ථානවලට මිලි මීටර් 100 ට වැඩි තද වැසි ඇති විය හැකි බවද කාලගුණ විද්යා දෙපාර්තමේන්තුව පෙන්වා දෙනවා.
මධ්යම කඳුකරයේ නැගෙනහිර බෑවුම් ප්රදේශවලත්, උතුරු, උතුරු-මැද, වයඹ, මධ්යම, ඌව, නැගෙනහිර සහ දකුණු
පළාත්වලත්, ගම්පහ සහ කොළඹ දිස්ත්රික්කවලත් විටින් විට හමන පැයට කිලෝ මීටර් 50 – 60 දක්වා වන ඉතා තද සුළං සමඟ විටින් විට හමන පැයට කිලෝ මීටර් 70 දක්වා වන ප්රහාරාත්මක සුළං ඇති විය හැකි බවටත් එම නිවේදනයේ සඳහන්.
ගිගුරුම් සහිත වැසි සමග ඇති විය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්ය පියවර ගන්නා ලෙස ජනතාවගෙන් කාරුණිකව ඉල්ලා සිටිනවා.
