දිනකට ඉන්ධන ට්‍රක් රථ දෙකකට ගාසා තීරයට ඇතුළු වීමට අවසර

ඇමරිකා එක්සත් ජනපදයෙන් කරන ලද බලපෑම් මත දිනකට ඉන්ධන ට්‍රක් රථ දෙකකට ගාසා තීරයට ඇතුළු වීමට අවසර දෙන බව ඊශ්‍රායලය ප්‍රකාශ කර තිබෙනවා.

එක්සත් ජනපද රාජ්‍ය දෙපාර්තමේන්තු නිලධාරියෙකු පවසන්නේ සෑම දින දෙකකට වරක් ඉන්ධන ලීටර් 140,000කට පමණ මෙලෙස ගාසා තීරයට පැමිණීමට අවසර දීමට පියවර ගෙන ඇති බවයි.

එම ඉන්ධන බොහොමයක් එක්සත් ජාතීන්ගේ සංවිධානයේ ආධාර බෙදා හරින ට්‍රක් රථ සඳහා මෙන්ම ජලය සහ සනීපාරක්ෂාව සැපයීම සඳහා වන කටයුතු වෙනුවෙන් යොදා ගැනීමටයි නියමිතව ඇත්තේ.

ඉතිරිය ඉන්ධන නොමැතිකම හේතුවෙන් ඇනහිට තිබූ ජංගම දුරකථන සහ අන්තර්ජාල සේවා සඳහා යොදා ගැනෙනු ඇති.

සිකුරාදා, ගාසාහි සන්නිවේදන සපයන සමාගම පැවසුවේ පලස්තීන සරණාගතයින් සඳහා වන එක්සත් ජාතීන්ගේ ඒජන්සිය වන Unrwa හරහා ඉන්ධන ස්වල්පයක් ලැබීමෙන් පසු එහි සේවාවන් යළි ආරම්භ කරන බවයි.

මෙම ඉන්ධන ගිවිසුම ක්‍රියාත්මක කිරීම සඳහා වොෂින්ටනය ඊශ්‍රායලයට සැලකිය යුතු පීඩනයක් එල්ල කළ බව එක්සත් ජනපද නිලධාරියෙකු ප්‍රකාශ කර තිබෙනවා.

මෙම ගනුදෙනුව සති කිහිපයකට පෙර ප්‍රතිපත්තිමය වශයෙන් එකඟ වූ නමුත් හේතු දෙකක් නිසා ඊශ්‍රායලය විසින් එය ප්‍රමාද කරනු ලැබුවා. ඊශ්‍රායල නිලධාරීන් එක්සත් ජනපදයට ප්‍රකාශ කළේ දකුණු ගාසා තීරයේ ඇත්ත වශයෙන්ම ඉන්ධන අවසන් වී නොමැති බවත්, ඔවුන්ට ප්‍රාණ ඇපකරුවන් ගනුදෙනුවක් ගැන මුලින්ම සාකච්ඡා කළ හැකිදැයි බලා සිටීමට අවශ්‍ය බවයි.

පලස්තීන සරණාගතයින් සඳහා වන එක්සත් ජාතීන්ගේ ඒජන්සියේ ප්‍රධානියා බ්‍රහස්පතින්දා අනතුරු ඇඟවූයේ ඉන්ධන නොමැතිකම හේතුවෙන් තමන්ට එහි සියලුම ක්‍රියාකාරකම් අත්හිටුවීමට සිදුවිය හැකි බවයි.

මූලික මානුෂීය මෙහෙයුම් සඳහා දිනකට ඉන්ධන ලීටර් 160,000ක් අවශ්‍ය බව ඒජන්සිය සඳහන් කළා. එය ඊශ්‍රායලය එකඟ වී ඇති ඉන්ධන ප්‍රමාණයට වඩා දෙගුණයකටත් වඩා වැඩි ප්‍රමාණයක්.

මීට පෙර ඊශ්‍රායල නිලධාරියෙකු පැවසුවේ නව ඉන්ධන දීමනාව හමාස් වෙත නොපැමිණෙන්නේ නම් එක්සත් ජාතීන්ගේ සංවිධානය හරහා දකුණු ගාසා තීරයේ සිවිල් ජනතාව වෙත රෆා හරස් මාර්ගය හරහා ඉන්ධන ගෙන එන බවයි.

ප්‍රදේශයේ පැතිර යා හැකි වසංගත රෝග පැතිරීම වැළැක්වීම සඳහා ඉන්ධන ජලය, අපද්‍රව්‍ය සහ සනීපාරක්ෂක පද්ධති සඳහා සහාය ලබා දෙන බව ඊශ්‍රායල නිලධාරියා ප්‍රකාශ කර තිබුණා.

ගාසා තීරයේ පවතින මානුෂීය තත්ත්වය පිළිබඳව ජාත්‍යන්තර සංවිධාන නැවත නැවතත් දැඩි කනස්සල්ල පළ කර තිබෙනවා.

ඉන්ධන නොමැතිකම සහ ඊශ්‍රායල බෝම්බ හෙලීම හේතුවෙන් ගාසා තීරයේ සෞඛ්‍ය සේවා පද්ධතිය සහ සනීපාරක්ෂක පහසුකම්වලට දැඩි බලපෑම් එල්ලවී තිබෙනවා.

මේ හේතුවෙන් ගාසා තීරයේ රෝග පැතිරීමට ඇති ප්‍රවණතා පිළිබඳව ලෝක සෞඛ්‍ය සංවිධානය (WHO) මීට පෙර අනතුරු අඟවා තිබුණා.

සිකුරාදා, පලස්තීන ප්‍රදේශයේ WHO හි නියෝජිත රිචඩ් පීපර්කෝන් පැවසුවේ උග්‍ර ශ්වසන ආසාදන 70,000 කට වැඩි ප්‍රමාණයක් සහ පාචනය රෝගීන් 44,000 කට වඩා වාර්තා වී ඇති බවයි.

එම සංඛ්‍යාලේඛන බලාපොරොත්තු වූවාට වඩා සැලකිය යුතු ලෙස ඉහළ යමක් බව ද සඳහන්.

එන්ක්ලේව්හි desalination කම්හල ක්‍රියාත්මක කිරීමට, නිවාස හා රෝහල්වලට විදුලිය සැපයීමට සහ සනීපාරක්ෂාව, ප්‍රවාහනය සහ සන්නිවේදන යටිතල පහසුකම් සඳහා ද ගාසා තීරයට ඉන්ධන අවශ්‍ය වනවා.

භූමිය වටා ආධාර සැපයීම සඳහා ද එය ඉතා වැදගත් වන බවයි නිලධාරීන් පෙන්වා දෙන්නේ.

ඊශ‍්‍රායලය ගාසා තීරයට ඉන්ධන ඇතුළු වීම වළක්වමින් සිටින්නේ එය හමාස් සංවිධානය විසින් සොරකම් කර හමුදා කටයුතු සඳහා භාවිත කළ හැකි බවට තර්ක කරමින්.

මේ වන විට ක්‍රියාත්මක යුද්ධයට පෙර ඊශ්‍රායලය ගාසා තීරයේ විදුලි බලයෙන් වැඩි ප්‍රමාණයක් සැපයූ අතර ඇතැම් ඒවා නිෂ්පාදනය කරන ලද්දේ තවදුරටත් ක්‍රියාත්මක නොවන එන්ක්ලේව්හි එකම බලාගාරය මගින්.

ඊශ්‍රායල බලධාරීන්ට අනුව, එක්සත් රාජධානිය, එක්සත් ජනපදය සහ අනෙකුත් බලවතුන් විසින් ත්‍රස්ත සංවිධානයක් ලෙස තහනම් කරන ලද හමාස් කණ්ඩායම 1,200ක් පමණ මරා දමා 230කට වැඩි පිරිසක් ප්‍රාණ ඇපයට ගත් පසුව ඊශ්‍රායලයේ නවතම වැටලීම සහ හමුදා මෙහෙයුම ආරම්භ වුණා.

පලස්තීන ප්‍රදේශයේ හමාස් පාලනය කරන සෞඛ්‍ය අමාත්‍යාංශයට අනුව ඊශ්‍රායලය ප්‍රතිප්‍රහාර එල්ල කිරීම ආරම්භ කළ දා සිට අවම වශයෙන් ප්‍රදේශයේ මිනිසුන් 12,000ක් පමණ මිය ගොස් ඇතැයි සඳහන්.