ජනතාව පීඩාවට පත් කරමින් පොල්ගහවෙල හදගල ප්‍රදේශයේ අවිධිමත් ලෙස පවත්වාගෙන ගිය ඌරු ගොවිපලක් ඉවත් කර ගැනීමට එහි හිමිකරු එකඟතාව පල කර තිබෙනවා.
ඒ අදාළ ඌරු ගොවිපල හේතුවෙන් ප්‍රදේශවාසීන් මුහුණ දී සිටින ගැටලු පිළිබඳ දසත නිවුස් කළ අනාවරණයෙන් පසුව පැවති සාකච්ඡාවකදී.
නීතිවිරෝධි හා අවිධිමත්ව පවත්වාගෙන ගිය මෙම ඌරු ගොවිපොළ හේතුවෙන් ප්‍රදේශයේ වගාවන් හා ජල මූලාශ්‍රවලට අපද්‍රව්‍ය එක් වීමෙන් විශාල හානියක් සිදුව තිබුණා.
ඌරු ගොවිපොළ හේතුවෙන් තමන් විඳින පීඩාවන් පිළිබඳ ප්‍රදේශවාසීන් අවස්ථා කිහිපයකදී බලධාරීන් දැනුවත් කළද නිසි විසඳුමක් ලැබුණේ නැහැ.
දසත නිව්ස් ඔස්සේ මේ පුවත විකාශය වීමෙන් පසු වයඹ පළාත් පරිසර අධිකාරියේ අධ්‍යක්ෂවරයා මේ සම්බන්ධයෙන් අවධානය යොමු කර තිබෙනවා.
ඒ අනුව ගොවිපොළේ හිමිකරු හා ප්‍රදේශවාසීන් අතර සාකච්ඡාවක් පැවැත්වුණා.
හිමිකරු එහිදී එකඟතාව පල කර ඇත්තේ මාසයක් ඇතුළත ගොවිපොළ ඉවත් කර ගන්නා බවටයි.
දීර්ඝ කාලයක් තිස්සේ බලධාරින්ගේ අවධානය නොලැබුණු සිය ගැටලුවට විසඳුමක් ලැබීම සම්බන්ධයෙන් ජනතාව තුල ඇත්තේ මහත් ප්‍රසාදයක්.
