දඹුල්ලේ පැවති පන්දුවාර 20 ක්රිකට් තරගාවලියේ දී මුදලට තරග පාවාදීමේ චෝදනාව යටතේ පවරා ඇති නඩුවේ විත්තිකාර අමිත් පටෙල් හෙවත් යෝගි පටෙල් නමැත්තා අත්අඩංගුවට ගෙන අධිකරණයට ඉදිරිපත් කිරිමට මාතලේ මහාධිකරණ විනිසුරු රවින්ද්ර ප්රේමරත්න මහතා අද (24) වරෙන්තු නිකුත් කළා.
තමන් ශ්රී ලංකාවෙන් පිටවූ බව සිය සේවාදායකයා විසින් ම තමන්ට දැනුම්දෙනු ලැබූ බව එම විත්තිකරුවන් වෙනුවෙන් පෙනී සිටි නීතිඥ මහේෂ් කළගම්පිටිය මහතා මහාධිකරණ විනිසුරුවරයාට දැනුම්දුන් බවයි දසත අධිකරණ වාර්තාකරු පැවසුවේ.
එම විත්තිකරුට විදේශගත වීම වළක්වමින් අධිකරණය විසින් තහනම් නියෝගයක් නිකුත් කරන ලද නමුත් ඔහු රහසිගත ව රටින් පිටව ගොස් ඇති බව පෙන්වාදෙමින් නීතිපතිවරයා වෙනුවෙන් පැමිණිල්ල මෙහෙය වූ රජයේ ජ්යේෂ්ඨ අධිනීතිඥ උදාර කරුණාතිලක මහතා ද ක්රීඩා වැරදි වැළැක්වීමේ පොලිස් විශේෂ විමර්ශන ඒකකය ඉදිරිපත් කළ වාර්තාවක් සමග මෝසමක් ඉදිරිපත් කරමින් මින් පෙර මහාධිකරණයට දැනුම්දී තිබුණා.
අධිකරණය විසින් නිකුත් කරන ලද නියෝග අනුව එම විත්තිකරු වෙනුවෙන් අධිකරණය හමුවේ දී ඇප බැඳුම්කර අත්සන් කළ ඇපකරුවන් දෙදෙනා අද අධිකරණය හමුවේ පෙනී සිටියා.
වහාම එම විත්තිකරු ඉදිරිපත් කිරීමට පියවර ගන්නා ලෙසටත්, එය කිරීමට අපොහොසත් වුවහොත් ඇප මුදල් දඩයක් ලෙස අයකර ගැනීමට නියෝග කරන බවටත් විනිසුරුවරයා එම ඇපකරුවන්ට තරයේ අවවාද කළා.
පැමිණිල්ලේ සාක්ෂි විභාගය ලබන 30 වැනිදා ආරම්භ කිරීමට දින නියම කළ විනිසුරුවරයා විත්තියේ සාක්ෂිකරුවන්ට සිතාසි ද නිකුත් කෙරුණා.
විත්තිකරුවන් ඇපකරුවන් වෙනුවෙන් ජ්යේෂ්ඨ නීතිඥ රංජිත් හීල්ලගේ මහතා පෙනී සිටි අතර රජයේ ජ්යේෂ්ඨ අධිනීතිඥ උදාර කරුණාතිලක මහතා නීතිපතිවරයා වෙනුවෙන් පැමිණිල්ල මෙහෙයවනු ලැබුවා.
